12 Opprettingar og presiseringar m.m.

12.1 Skatteforvaltningsloven § 7-10 fyrste ledd bokstav h

Skatteforvaltningsloven § 7-10 inneheld føresegner om opplysningsplikter for tredjepartar. Etter fyrste ledd bokstav h skal oppstartselskap gje opplysningar om tildelte og innløyste opsjonar til tilsette etter ordninga i «skatteloven § 5-14 fjerde ledd».

Gjeldande føresegn vart foreslått i Prop. 1 LS (2020–2021) Skatter, avgifter og toll 2021, med utgangspunkt i den dåverande særordninga for skattlegging av tilsetteopsjonar i små oppstartsselskap. Føresegna trådde i kraft 1. januar 2021.

Ved handsaminga av statsbudsjettet for 2022 vedtok Stortinget to endringar i skatteloven som har betydning for rapporteringsføresegna i skatteforvaltningsloven. Det vart likevel ikkje fremja framlegg til justeringar i rapporteringsføresegna i skatteforvaltningsloven.

Den eine endringa var at ordninga med skattefritak for fordel ved tilsettes kjøp av aksjar mv. til underkurs vart avvikla. Denne ordninga var heimla i skatteloven § 5-14 fyrste og andre ledd, som vart oppheva.

Den andre endringa var at opsjonsskatteordninga vart utvida til selskap i ein vekstfase.

Departementet foreslår på denne bakgrunnen å rette opp føresegna i skatteforvaltningsloven § 7-10 fyrste ledd bokstav h, slik at verkeområdet for ordninga det skal rapporterast om, kjem fram. I tillegg vert tilvisinga til skatteloven retta opp. Departementet foreslår at endringa tek til å gjelde straks.

12.2 Skatteloven § 19-6 fyrste ledd bokstav i

Skatteloven § 19-6 inneheld reglar om frådrag i grunnrenteinntekta for havbruksverksemd. Fyrste ledd bokstav i gjeld frådrag for vederlag for kjøp av løyve og kapasitet i åra 2018 og 2020. I anna punktum er det ein ortografisk feil, slik at lovteksten lyder «fradaget» og ikkje «fradraget». Departementet foreslår å rette ordlyden til «fradraget». Departementet syner til framlegg om endring i skatteloven § 19-6 fyrste ledd bokstav i anna punktum. Departementet foreslår at endringa tek til å gjelde straks.

12.3 Skatteloven § 5-43 fyrste ledd bokstav j

Folketrygdlova § 3-24 om ektefelletillegg er oppheva frå og med 1. januar 2025, jf. Prop. 5 L (2024 –2025) Endringar i folketrygdlova og enkelte andre lover (oppfølging av forslag i statsbudsjettet 2025 m.m.). I skatteloven § 5-43 fyrste ledd bokstav j går det fram at ektefelletillegg etter folketrygdlova § 3-24, som vert utbetalt til mottakarar av alderspensjon, og tilsvarande ektefelletillegg som vert utbetalt til mottakar av avtalefesta pensjon, er skattefritt i tilfelle der dei var mottakarar av ektefelletillegg 31. desember 2010.

Departementet foreslår difor at føresegna i skatteloven § 5-43 fyrste ledd bokstav j, som syner til folketrygdlova § 3-24, òg vert oppheva. Departementet foreslår at endringa tek til å gjelde straks.