7 Styring av Bypakke Kristiansund

Bypakke Kristiansund vil bli gjennomført etter prinsippa for porteføljestyring, der ansvaret for porteføljestyring av prosjekta er lagt til ei styringsgruppe med representantar frå Møre og Romsdal fylkeskommune, Kristiansund kommune og Statens vegvesen. Styringsgruppa vil bli leia av Kristiansund kommune. Arbeidet med porteføljestyringa skal skje gjennom ei årleg rullering av eit fireårig handlingsprogram med hovudvekt på mål- og resultatstyring.

Som for andre bypakker er det føresett at omfanget av utbygginga i Bypakke Kristiansund må tilpassast tilgjengelege inntekter innanfor rammene av den fastsette gjennomsnittstaksten, fylkeskommunal lånegaranti og den fastsette innkrevjingstida. Viss økonomien i bypakka blir dårlegare enn venta og/eller nokre prosjekt blir dyrare enn opphavleg rekna, må det kuttast i den vedtekne prosjektporteføljen. Blir økonomien i bypakka betre enn venta og/eller nokre prosjekt blir rimelegare enn opphavleg rekna, er det lagt til grunn at tiltak frå marginallista kan gjennomførast. Alternativt kan takstane og/eller innkrevjingsperioden bli redusert, under føresetnad av at bomselskapet sine låneforpliktingar er oppfylte. Den prioriterte prosjektlista og marginallista, som er vedteken av Kristiansund kommune og Møre og Romsdal fylkeskommune, blir lagt til grunn for bypakka. Det første handlingsprogrammet blir fastsett så snart som mogleg etter at bypakka er behandla av Stortinget.