1 Innleiing

Samferdselsdepartementet legg i denne proposisjonen fram forslag om delvis bompengefinansiering av ei bypakke for Kristiansund (Bypakke Kristiansund), i tråd med vedtak frå lokale styresmakter og forslag til ei kostnadsramme for rv. 70 Vikansvingen–Kontrollplassen, som er føresett 100 pst. finansiert med bompengar. Bypakke Kristiansund omfattar prosjekt og tiltak på riksveg, fylkesveg og kommunal veg som samla sett skal bidra til byutvikling og utvikling av transportløysingane i byen. Tiltaka skal òg leggje grunnlaget for at meir av veksten i persontransport kan takast med kollektivtransport, sykkel og gange.

Samla økonomisk ramme for Bypakke Kristiansund er førebels rekna til om lag 2,2 mrd. kr. Finansieringa er basert på bompengar, statlege midlar til nokre mindre investeringstiltak og fylkeskommunale midlar. I tillegg kjem meirverdiavgifta som staten refunderer til Kristiansund kommune og Møre og Romsdal fylkeskommune for prosjekt og tiltak i bypakka.

I tråd med dei lokalpolitiske vedtaka er det lagt til grunn at det skal etablerast to bomstasjonar på rv. 70 i Kristiansund, med tovegs innkrevjing av bompengar. Det er lagt til grunn ein innkrevjingsperiode på inntil 15 år med oppstart av innkrevjinga i løpet av 2026. Utbygginga av prosjekt og tiltak i bypakka skal styrast etter prinsippa for porteføljestyring.