3 Endringar på statsbudsjettet for 2025
Kap. 2315 (Nytt) Lønsregulering for arbeidstakarar i det statlege tariffområdet
Post 01 (Ny) Driftsutgifter
Samla bruttoutgifter ved lønsreguleringa for arbeidstakarar i det statlege tariffområdet per 1. mai 2025, er for perioden 1. mai – 31. desember 2025 rekna ut til 4 710 mill. kroner. Løyvingsoverslaget byggjer på berekna lønsmasse i det statlege tariffområdet per 1. januar 2025.
Overslaget omfattar alle tilsette som får si løn fastsett etter hovudtariffavtalane i staten. Meirutgifter som følgje av auka satsar for overtid og arbeidsgjevaravgift er medrekna. Vidare er meirutgifter til pensjonspremiebetaling medrekna.
Meirutgifter i samband med lønsreguleringane for forvaltingsorgan med særskilde fullmakter og forvaltingsbedrifter, blir dekte innanfor budsjetta til verksemdene.
Verksemder med arbeidstakarar som får løn administrativt fastsett i kontrakt, må sjølve dekke meirutgiftene av lønsregulering innanfor eksisterande budsjett.
Etter fråtrekk av det ovanfor nemnde, er meirutgiftene rekna til 3 533 mill. kroner. Etter vanleg praksis blir slike meirutgifter dekte ved at det blir ført opp løyving under kap. 2315 Lønsregulering for arbeidstakarar i det statlege tariffområdet, post 01 Driftsutgifter, som Finansdepartementet blir gitt fullmakt til å fordele, jf. forslag til romartalsvedtak VII.
Kap. 1560 Tariffavtalte avsetningar
Post 71 Opplæring og utvikling av tillitsvalde
Løyvinga dekker tilskot til opplæringstiltak for tillitsvalde til organisasjonane i staten innanfor mellom anna organisasjons- og tillitsvaldarbeid, miljø og vernearbeid, sjukefråvær, medråderett, personalpolitiske spørsmål, omstilling, effektivisering og samfunnsøkonomi m.m. Retningslinjer for opplærings- og utviklingstiltak er fastsett i eigen særavtale mellom staten og hovudsamanslutningane (avtale om OU-midlar).
Departementet foreslår at løyvinga blir auka med 14,7 mill. kroner. Summen er rekna ut med bakgrunn i talet på årsverk og lønsmasse i statleg tariffområde per 1. oktober 2024. Det blir også vist til forslag i Prop. 146 S (2024–2025) Tilleggsbevilgninger og omprioteringer i statsbudsjettet 2025 om å auke løyvinga på posten med 14,2 mill. kroner i 2025 i samband med vidareføring av ein auke i 2024 knytt til hovudtariffoppgjeret for tariffperioden 2024–2026. Under føresetnad av at Stortinget vedtek begge forslaga om auka løyving, vil løyvinga på posten vere 262 mill. kroner.
Kap. 2309 Tilfeldige utgifter
Post 01 Driftsutgifter
Det er avsett midlar til dekning av meirutgiftene ved lønsregulering for arbeidstakarar i det statlege tariffområdet m.m. Løyvinga under kap. 2309 Tilfeldige utgifter vil bli redusert i samband med proposisjonen om ny saldering av statsbudsjettet 2025 til hausten.