3 Dagens situasjon og omtale av aktuelle tiltak

Vegstandarden på rv. 7 gjennom Hallingdal er generelt vesentleg lågare enn det funksjonen og trafikkbelastninga til vegen tilseier. Dette gjer seg mellom anna utslag i dårlegare framkome, regularitet og trafikktryggleik enn ønskeleg. Det er også manglande tilbod til gåande og syklande. For å sikre god framkome og trafikktryggleik på rv. 7, er det naudsynt med utbetring og omlegging i ulikt omfang.

Fleire delstrekningar på rv. 7 gjennom Hallingdal har stort behov for utbetring av drenering, sideterreng, bereevne og dekke. I tillegg gir stadvis smal vegbreidde og krappe kurvar utfordringar for framkome og trafikktryggleik. Enkelte strekningar har stigningsforhold på 6 pst. og høgare, og er i ein del samanhengar kopla til dårleg kurvatur og låg skilta frihøgde i tunnelar. Ein del bruer er òg smale i kombinasjon med krapp kurvatur. Ulykkessituasjonen på rv. 7 er problematisk, og i perioden 2014–2023 var det 48 trafikkulykker med 53 lettare skadde, 10 hardt skadde og 9 drepne på strekninga Ørgenvika – Svenkerud. Dei aller fleste av ulykkene er møte- og utforkøyringsulykker. Trafikken gjennom veka varierer mykje på strekninga, som følgje av fritidsreiser knytt til helgar og feriar. Døgntrafikken varierer mellom 3 – 4 000 køyretøy på kvardagar og så høgt som 9 – 15 000 køyretøy i helgar og ferieveker. Det er i hovudsak helgetrafikken fredag og søndag, og til dels torsdag som skaper utfordringar med redusert trafikktryggleik og dårleg framkome.

I tråd med grunnlaget for dei lokalpolitiske vedtaka i saka er det lagt til grunn at inntektene frå ei vidareføring av bompengeinnkrevjinga skal gå til å framskunde utbetringane på strekninga mellom Kittilsvik og Gol på rv. 7 gjennom Hallingdal. Statens vegvesen har identifisert ein portefølje med utbetringstiltak som kan framskundast som følgje av at innkrevjinga på rv. 7 Sokna – Ørgenvika kan vidareførast fram til juni 2029, sjå figur 3.1 og tabell 3.1 under. Samla finansieringsbehov for desse tiltaka er førebels rekna til om lag 430 mill. 2025-kr. I tillegg til dei nemnde utbetringstiltaka er det i tråd med dei lokalpolitiske vedtaka sett av om lag 50 mill. 2025-kr til førebuande arbeid for rv. 7 Ørgenvika – Kittilsvik, herunder innløysing av bustader i regulert vegareal, utarbeiding og kvalitetssikring av styringsunderlag og kostnadsoverslag, samt byggjeplanlegging og prosjektering.

Kjelde: Statens vegvesen

Det samla finansieringsbehovet som er rekna ut, er noko høgare enn det forventa bompengebidraget i ein vidareført innkrevjingsperiode fram til juni 2029. Det er samtidig knytt stor usikkerheit til kor raskt desse tiltaka kan gjennomførast og til fleire av kostnadsoverslaga. Omfanget av utbetringane blir derfor tilpassa dei faktiske bompengeinntektene. Det blir ikkje lagt opp til låneopptak i den vidareførte innkrevjingsperioden. Eventuelle kostnadsaukingar må handterast innanfor rammene av dette. Dersom kostnadene for nokre av tiltaka aukar, vil det innebere at andre tiltak ikkje blir gjennomførte. Dersom enkelte prosjekt/tiltak blir rimelegare eller inntektene høgare enn føresett, blir det plass til fleire tiltak.

Statens vegvesen vil få ansvar for gjennomføringa av tiltaka. Rekkefølgja og prioriteringa av utbetringstiltaka i tabell 3.1 vil bli vurdert fortløpande i samråd med lokale styresmakter.

Samtidig med gjennomføring av utbetringstiltaka vil det bli gjennomført flaumsikringstiltak som følgje av uvêret Hans på utbetringsstrekninga. Det blir mellom anna vurdert flaumsikring for rv. 7 gjennom sentrum av Nesbyen og på rv. 7 mellom Strandi og Roasvingen. Desse tiltaka må koordinerast med utbetringstiltaka og kan om mogleg byggjast samtidig. Men flaumsikringstiltaka skal ikkje finansierast av bompengar frå den vidareførte innkrevjinga. Tidleg oppstart av flaumsikringstiltaka vil kunne gje tidlegare oppstart av dei utbetringstiltaka som må sjåast i samanheng med desse flaumsikringstiltaka.