1 Innleiing

Samferdselsdepartementet legg i denne proposisjonen fram forslag om å vidareføre bompengeinnkrevjinga på rv. 7 Sokna – Ørgenvika i Buskerud fram til juni 2029. Dagens takstnivå og rammene for fastsett gjennomsnittstakst i bomstasjonen er føresett vidareført med nokre justeringar av takstsystemet. Inntektene skal gå til å påskunde naudsynte utbetringar av rv. 7 på strekninga mellom Kittilsvik og Gol, samt førebuande arbeid for utbyggingsprosjektet rv. 7 Ørgenvika – Kittilsvik. Forslaget er ein pilot knytt til bompengeinnkrevjing slik det er opna opp for i Meld. St. 14 (2023–2024) Nasjonal transportplan 2025–2036.