3 Kostnadsramme for prosjektet E45 Kløfta i Finnmark

Prosjektet E45 Kløfta er i Meld. St. 14 (2023–2024) Nasjonal transportplan 2025–2036 føresett starta opp i første seksårsperiode. I Prop. 1 S (2024–2025) for Samferdselsdepartementet har regjeringa lagt til grunn midlar til prosjektstart i 2025, og opplyst at den ville kome tilbake til Stortinget med forslag om kostnadsramme når det var gjennomført ekstern kvalitetssikring (KS2) av prosjektet.

Strekninga er skredutsett og har stadvis krevjande stigningsforhold. På grunn av dette er strekninga ein flaskehals for tungtrafikken mellom Finnmark og utlandet om vinteren. Dagens veg har også stadvis dårleg standard. Prosjektet er på 7,6 km og består av ein tunnel på 4,2 km, 3,2 km veg i dagen og ei bru på 150 meter. Prosjektet vil gi ein sikker, føreseieleg og god heilårsveg. Vegen blir bygd med ei breidd på 9 meter.

Den eksterne kvalitetssikringa (KS2) er no gjennomførd. Kvalitetssikringa har omfatta prosjektstyringsunderlag og kostnadsoverslag. Det er liten skilnad mellom tala frå kvalitetssikrar og Statens vegvesen. Statens vegvesen foreslo ei styringsramme på 1 602 mill. 2022-kr og ei kostnadsramme på 1 817 mill. 2022-kr. Ekstern kvalitetssikrar har tilrådd ei styringsramme på 1 667 mill. 2022-kr og ei kostnadsramme på 1 812 mill. 2022-kr.

Det er stor grad av samsvar mellom ekstern kvalitetssikrar og Statens vegvesen sine vurderingar og tilråding til styringsramme. Skilnaden mellom ekstern kvalitetssikrar og Statens vegvesen sine tilrådingar til kostnadsramme gjeld i hovudsak byggherrekostnader og kostnader knytt til tunnel og rigg. I tillegg er vurderingane om moglege kutt i prosjektet ulike. Statens vegvesen foreslår at kostnadsramma blir fastsett i tråd med forslaget frå ekstern kvalitetssikrar, men justert for at omfanget av kutt i prosjektet er vurdert som lågare enn foreslått av kvalitetssikrar. Justert for dette foreslår Statens vegvesen ei styringsramme på 1 667 mill. 2022-kr, og ei kostnadsramme på 1 870 mill. 2022-kr. Rekna om til 2025-prisnivå blir styringsramma 1 836 mill. kr og kostnadsramma 2 059 mill. kr.

Etter ei samla vurdering legg Samferdselsdepartementet til grunn Statens vegvesen sitt justerte forslag til styringsramme og kostnadsramme etter gjennomført ekstern kvalitetssikring. Departementet foreslår derfor ei kostnadsramme på 2 059 mill. 2025-kr, jf. forslag til romartalsvedtak. Som grunnlag for seinare prisomrekning blir prisnivået i 2022 nytta som referanse.

Det er lagt opp til anleggsstart på prosjektet i 2026, og det er venta opna for trafikk i 2029.