Prop. 52 L (2024–2025)

Proposisjonen inneheld framlegg til ny lov om dokumentasjon og arkiv (arkivlova) som erstattar gjeldande lov 4. desember 1992 nr. 126 om arkiv. Lova skal medverke til ei forsvarleg og etterretteleg offentleg forvaltning ved at dokumentasjon i forvaltninga blir forvalta som arkiv. Dokumentasjonen skal vere tilgjengeleg for allmenta, slik at innbyggjarane kan føre kontroll med forvaltninga, styrkje rettstryggleiken sin og delta i ei open og opplyst offentleg samtale. Lova skal òg leggje til rette for at arkiva kan tene som kulturarv, vere kjelder til historisk kunnskap og gi grunnlag for forsking. Framlegget inneber at hovudtrekka i gjeldande rett blir vidareført, men tilpassa den teknologiske utviklinga og moderne dokumentasjonsforvaltning. Vesentlege endringar er at verkeområdet blir foreslått utvida, og at Arkivverket endrar namn til Nasjonalarkivet. Nasjonalarkivet, som tilsynsstyresmakt, skal kunne påleggje rekonstruksjon av materiale som har gått tapt og gi tvangsmulkt for å rette alvorlege brot på lova.