4 Utvikling i 2024 for pensjonar opptent som regjeringsmedlem

Ved utgangen av 2024 fekk totalt 108 personar ein pensjon frå pensjonsordninga på bakgrunn av tidlegare oppteningstid som regjeringsmedlem (alderspensjon, uførepensjon eller etterlatnepensjon).

4.1 Alderspensjon

Ved inngangen til 2024 var det 71 alderspensjonistar i ordninga. I løpet av året har det vore avgang på to personar og tilgang på éin person. Per 31. desember 2024 var talet på alderspensjonistar derfor 70 personar.

Gjennomsnittleg utbetalt alderspensjon var 13 825 kroner per månad. Kvinner fekk i gjennomsnitt 13 611 kroner, medan menn i gjennomsnitt fekk 14 012 kroner.

Gjennomsnittleg uttaksalder for statsrådane varierer frå år til år, sidan talet på uttak er svært lågt.

Gjennomsnittsalderen for alle alderspensjonistar i ordninga var 78 år for kvinner og 80,4 år for menn. Samla sett var gjennomsnittsalderen 79,3 år.

4.2 Uførepensjon

Ved inngangen til 2024 var det ingen uførepensjonistar i ordninga. Det har vore tilgang på éin person med uførepensjon i løpet av året. Per 31. desember 2024 var det derfor éin uførepensjonist i ordninga.

Uførepensjon blir ofte innvilga med verknad tilbake i tid. Det kan derfor framleis bli innvilga uførepensjon som gjeld for 2024.

4.3 Etterlatnepensjon

Ved inngangen til 2024 var det 38 ektefellepensjonistar i ordninga. I løpet av året har det vore avgang på tre personar og tilgang på éin person. Per 31. desember 2024 var talet på ektefellepensjonistar derfor 36 personar.

Gjennomsnittleg utbetalt ektefellepensjon var 10 520 kroner per månad. Kvinner fekk i gjennomsnitt 10 749 kroner, medan menn i gjennomsnitt fekk 9 631 kroner.

Gjennomsnittsalderen for alle ektefellepensjonistar i ordninga var 81,4 år for kvinner og 75,8 år for menn. Samla sett var gjennomsnittsalderen 80,2 år.

Ved inngangen til 2024 var det éin person som tok imot barnepensjon. Det har ikkje vore tilgang eller avgang på mottakarar av barnepensjonar i løpet av året. Per 31. desember 2024 var det derfor framleis berre éin mottakar av barnepensjon.

4.4 Rekneskap for 2024

Pensjonsordninga for regjeringsmedlemer blir gitt tilskot til under kapittel 612 «Tilskudd til Statens pensjonskasse». I statsrekneskapen blei det utgiftsført 17 308 491 kroner til pensjonar. Det er ein liten auke frå 2023. Administrasjonskostnadene utgjorde 336 452 kroner. Dette er ein nedgang frå 2023.