Partssamansett arbeidsgruppe skal vurdere risikotilstanden på sokkelen
Nyheit | Dato: 04.04.2025 | Energidepartementet
Energidepartementet har utnemnt ei partssamansett arbeidsgruppe som skal vurdere risikotilstanden på norsk sokkel. Gruppa skal sjå på tilstand og risiko i petroleumsverksemda og i dei nye havindustrinæringane på sokkelen: havvind, transport og lagring av CO2 og havbotnmineralverksemd. Gruppa skal leiast av professor Geir Sverre Braut.
– Det er viktig at me no har fått ei arbeidsgruppe som skal gi oppdatert status for risikotilstanden på norsk sokkel. Dette vil danne grunnlag for ei komande stortingsmelding om sikkerheit og arbeidsmiljø på sokkelen. Den siste meldinga til Stortinget på dette området kom i 2018, og det har skjedd store endringar sidan då. Eg ønskjer arbeidsgruppa lykke til med det viktige arbeidet som no startar opp, seier energiminister Terje Aasland.
Arbeidsgruppa har medlemmer frå arbeidslivspartane offshore og Havindustritilsynet. Gruppa skal arbeide med følgjande tema:
- Tilstands- og risikobiletet i petroleumsverksemda, med vekt på utviklingstrekk dei siste 5-6 år og eventuelle behov for endringar i risikofaktorar som blir følgde over tid.
- Betydninga auka fokus på sikring i petroleumsverksemda har for partssamarbeidet.
- Tilstands- og risikobiletet i kvar av dei nye havindustrinæringane på Energidepartementets ansvarsområde, med vekt på identifisering av dei mest vesentlege risikofaktorane som bør følgjast over tid.
Dei siste åra har utviklinga på norsk sokkel vore prega av betydelige endringar. Næringa tek raskt i bruk ny teknologi, og den auka bruken av maskinlæring og kunstig intelligens har noko å seie både for effektiviteten og for risikoforholda. Klima- og miljøpolitikken aukar behovet for meir fornybar energi og tiltak for å redusere CO2-utslepp. Samtidig er petroleumsaktiviteten høg, noko som er viktig for energitryggleiken i Europa. Endringane i den geo- og sikkerheitspolitiske situasjonen har også hatt stor innverknad på sikkerheita og risikobiletet offshore. Alle desse utviklingstrekka påverkar på ulike måtar sikkerheita og arbeidsmiljøet i industriverksemda på sokkelen.
Arbeidsgruppa skal levere rapporten sin til Energidepartementet innan 25. mars 2026.
Arbeidsgruppa har følgjande medlemmer:
- Geir Sverre Braut (Time), leiar for arbeidsgruppa
- Morten Kveim (Stabekk), De samarbeidende organisasjoner (DSO)
- Kai Christoffersen (Arendal), EL og IT Forbundet
- Mohammad Afzal (Oslo), Fellesforbundet
- Dag Yngve Johnsen (Stavanger), Landsorganisasjonen i Norge (LO)
- Marte Gundersen (Stavanger), Lederne
- Berit Søgnen Sandven (Bergen), Norges Ingeniør- og Teknologorganisasjon (NITO)
- Irene Bergljot Åstein Dahle (Stavanger), SAFE
- Håkon Aasen Bjerkeli (Stavanger), Styrke
- Anne-Mette Aasheim (Bergen), Fornybar Norge
- Øyvind Jonassen (Tønsberg), Norges Rederiforbund
- Janike Amundsen Myre (Bergen), Norges Rederiforbund
- Sveinung B. Strandnæs (Egersund), Norsk Industri
- Berit Sørset (Oslo), Norsk Industri
- Aud Nistov (Oslo), Offshore Norge
- Asle Jøssang (Bergen), Offshore Norge
- Øystein Joranger (Stavanger), Offshore Norge
- Thorleif Husebø (Stavanger), Havindustritilsynet
- Hilda Kjeldstad (Stavanger), Havindustritilsynet