Vuoruhit bargoeallima ja nuoraid

– Go rasisma ja vealaheapmi beassá ráđđet, de hedjonit eallindilli, dearvvašvuohta, ja bargovejolašvuođat, ja skuvlavázzin heađuštuvvo Vearrámus dilis sáhttá rasismma dagahit heakka ovdii. Dan leat mii maiddái Norggas oaidnán. Ođđa doaibmaplána bokte bargat mii olahit nannoset servodaga, gos leat nannoset oktavuođat ja ovttalágan vejolašvuođat buohkaide, lohká bargo- ja searvadahttinministtar Tonje Brenna.

Doaibmaplána rasismma ja vealaheami vuostá lea olles ráđđehusa doaibmaplána. Plánabarggus leat ovcci departemeantta fárus. Plána 50 doaibmabiju bokte vuoruha ráđđehus doaibmabijuid bargoeallimii, báikkiin gos nuorat leat, ja báikkálaš vuoruhemiide.

Bargoeallin

Rasisma ja vealaheapmi dáhpáhuvvá manadettiin bargoeallimii ja go doppe áiggošii ovdánit. Danne deattuhuvvo doaibmaplánas dán eastadit, earret eará bargoaddiid veahkehemiin. Earret eará čađahuvvo kampánja ovttas bargoeallima bealálaččaiguin, man ulbmil lea ovddidit bargoaddiid diehtomielalašvuođa.

– Dađibahábut lea barggu ohcamis ain hehttehussan jus ohccis lea olgoriikkalaš namma, lohká bargo- ja searvadahttinministtar. Mii fertet maid oažžut eanet sisafárrejeddjiid organiseret iežaset vai eanebut dieđihivčče jus vásihit rasismma ja vealaheami iežaset bargosajiin.

Nuorat

– Go vásihat rasismma dahje vealaheami, de lea deaŧalaš ahte muhtin guldala du, ja jáhkká dasa maid muitalat. Dan birra leat mii ožžon olu cealkámušaid. Ráđđehus háliida ahte mánát ja nuorat geat vásihit rasismma ja vealaheami dieđáše gos sii sáhttet oažžut veahki, gos sáhttet gávdnat dorvvu, lohká Brenna.

Mangfaldsrådgjevarar leat ráđđeaddit skuvllain, geat rávvejit ja láidestit ohppiid geat vásihit rasismma ja vealaheami. Ráđđehus nanne eastadanbarggu givssideami ja loavkašuhttima vuostá, ja lágida buohkaid várás dili buori searvadahtti skuvlabirrasii. Ung.no galgá nannet iežas bagadanbarggu rasismma ja vealaheami vuostá.  

Báikkálaš vuoruheapmi

Olu suohkanat barget bures rasismma ja vealaheami vuostá. Máŋggain suohkaniin leat doaibmaplánat, diehtojuohkin ja fálaldagat mat leat álkit olámuttus. Muhto mii diehtit ahte leat stuora erohusat suohkanis suohkanii. Danne leat doaibmaplánas máŋga doaibmabiju mat dorjot suohkaniid, sihke ruđalaččat ja rávvagiid bokte – ja vuordámušat dasa ahte suohkanat galget oahppat guđet guoimmisteaset.

Bissovaš ja bistevaš vuoruheapmi

Bargu rasismma ja vealaheami vuostá gáibida bistevaš ja bisánkeahtes vuoruheami. Oallugat fertejit ovttas bargat.

Mis leat lágat vealaheami vuostá, ja maiddái gozihanvuogádat. Seammás leat oallugat geat eai dieđe maid galget dahkat go vásihit rasismma ja vealaheami. Dat galgá čuovvuluvvot plánas earret eará gozihanvuogádaga guorahallama bokte.

Plánabargui  leat máŋggat bealit buktán oaiviliid hástalusaid ja doaibmabijuid birra: KS, bargoeallima bealálaččat, eaktodáhtolaš organisašuvnnat, IMDi nuoraidpanela, dutkit, ovttaskas olbmot, Sámediggi ja guoskevaš eiseválddit.

Bargo- ja searvadahttindepartemeanta lea ovttasbarggus IMDiin ja Bufdirain lágidan gulahallančoahkkimiid Bergenis, Haugesundas, Hamaris, Kárášjogas, Kristiansandas, Oslos, Romssas ja Troanddimis.

Doaibmabijuid ovdamearkkat

Bargoeallimis: 

• Kampánja vealaheami vuostá bargoaddiid guovdu
• Eambbo sisafárrejeaddjit fágaservviin
• Ovdánahttit čearddalaš máŋggabealatvuođa indikáhtoriid bargoeallima várás
• Ođđa dutkan sisafárrejeddjiid birra bargoeallimis
• Eambbo máhttu dan birra movt cielaheapmi, rasisma ja vealaheapmi bargoeallimis sáhttá čuovvuluvvot

Nuoraid várás:

• Nannet barggu oadjebas ja buriid skuvlabirrasiid ovdánahttimis
• Mangfoldsrådgiver nammasaš ráđđeaddit galget rávvet ja bagadit ohppiid geat vásihit rasismma ja vealaheami
• Nannet barggu rasismma vuostá ung.no olis
• Doaibmabijut vealaheami vuostá láigomárkaniin
• Kártet man muddui gávdno njuolggo ja eahpenjuolggo vealaheapmi báŋkkuid loatnaaddimis

Báikkálaččat:

• Ruhtadoarjja ja bagadus suohkaniid bargui rasismma ja vealaheami vuostá
• Regionála čoagganeamit vásáhusaid lonohallama ja gelbbolašvuođaloktema várás
• Jahkásaš konferánsa rasismma vuostá, našuvnnalaš ja báikkálaš dásiide

Dasa lassin áigu maiddái ráđđehus nannet barggu rasismma ja vealaheami vuostá. Boahttevaš jagiid ovddiduvvo sierra plána sámevaši vuostá. Ráhkaduvvojit maiddái ođđa doaibmaplánat antisemittisma vuostá, ja muslimavaši ja muslimaid vealaheami vuostá.