Valáštallan oažžu buoret reaidduid gieđahallat seksuálalaš illasteami dieđihemiid

• Prop. 49 L (2024-2025) Lov om behandling av personopplysninger i Norges idrettsforbund og olympiske og paralympiske komité og deres organisasjonsledd for å forebygge, avdekke og reagere mot seksuelle overgrep, trakassering og vold mv. i idretten (dušše dárogillii)

– Mii leat oaidnán máŋga ášši mediain seksuálalaš illasteami, vuortnuheami ja veahkaválddálašvuođa birra valáštallamis. Dát lea leamaš hirbmat surgat lohkat. Dan ferte ja galgá álohii dieđihit politiijaide. Muhto mii áigut maiddái addit valáštallamii buoret reaidduid mot hálddašit dieđihemiid dán birra siskkáldasat. Láhkaevttohusas maid mii dál ovddidit, dahkat mii valáštallamii vuogádatlaččat álkibun čuovvolit dieđihemiid ja duomuid ovdamearkka dihte hárjeheddjiid ja eará luohttámušolbmuid vuostá - ja dainna lágiin eastadivččii ođđa dáhpáhusaid, dadjá kultur- ja dásseárvoministtar Lubna Jaffery.

Láhkaevttohusa váldoulbmil lea váikkuhit dasa ahte valáštallan galgá leat oadjebas arena, gos ii leat seksuálalaš illasteapmi, vuortnuheapmi ja veahkaválddálašvuohta, seammás go garvá beare viiddis sisabahkkema ovttaskas olbmo persovdnasuddjemii. Sihkkarastin dihte buori láhkačuovvoleami, de lea dehálaš ahte Norgga valáštallanlihttu áimmahuššá iežas bagadallanrolla ráđđeaddima, kurssaid ja bagadallanmateriála bokte. Erenoamáš dehálaš lea bagadit geatnegasvuođaid birra mat gieđahallanvásttolaččain, ovdamearkka dihte falástallansearvvis, leat go gieđahallet persovdnadieđuid.

– Seksuála vuortnuheamis ja illasteamis leat stuorra váikkuhusat, sihke ovttaskas olbmui ja servodahkii. Ollugat sáhttet dovdat ahte bággehallet eret valáštallamis, iežaset friddjaáiggedoaimmain, ja eret iežaset searvevuođas. Mii fertet dahkat nu álkin go vejolaš eastadit, fuobmát ja reageret seksuálalaš illasteami, vuortnuheami ja veahkaválddi vuostá. Danne áigu ráđđehus maiddái kártet dárbbuid eaktodáhtolaš suorggis obbalaččat, ja jus oaidnit sullasaš dárbbuid eará sajiin, de sáhttá leat áigeguovdil evttohit ođđa láhkavuođuid, dadjá kultur- ja dásseárvoministtar.