Jagi 2025/2026 Boazodoallošiehtadus nanne boazodoalu ráđđeaddinbálvalusa
Ođas | Almmustahtton: 15.04.2025 | Eanadoallo- ja biebmodepartemeanta
Okta jagi 2025/2026 Boazodoallošiehtadusa váldovuoruhemiin lea nannet boazodoalu ráđđeaddinbálvalusa. Láhčin dihtii diliid eanet ráđđeaddimii boazodoalus, lasihuvvo organisašuvdnadoarjja Norgga Boazosápmelaččaid Riikkasearvái (NBR).
Dalle sáhttá NBR lágidit kurssaid ja webináraid boazodolliide. Ain galgá leat čielga erohus gaskal ráđđeaddima, maid NBR sáhttá fállat, ja bagadallama maid hálddahus lea geatnegahtton addit.
Jagi 2025/2026 Boazodoallošiehtadusas nannejuvvo maiddái NBR ráđđeaddinbálvalus areálaáššiin. Nannen galgá buoridit areálabálvalusa kapasitehta, vai dat sáhttá veahkehit eanet áššiin.
Dat ráđđeaddin mii fállojuvvo galgá leat olámuttus buot boazodolliide ja álki geavahit, ja galgá fállojuvvot beroškeahttá NBR miellahttuvuođas.
Eanadoallo- ja biebmodepartemeanta ja NBR leat boazodoallošiehtadusa bokte máŋga jagi dorjon gealboloktema boazodoalus. Dilli lea láhččon eanet bálvalusaide mat fállet iešguđetlágan ráđđeaddimiid. NBR ráđđeaddinbálvalus areálaáššiin, DBS-bálvalus boazodoalu várás ja Dearvvašvuođabálvalus bohccuid várás leat dál ásahuvvon bistevaš bálvalussan. Jagi 2025/2026 Boazodoallošiehtadus ruhtada buot dáid bálvalusaid.
Norgga Boazosápmelaččaid Riikkasearvi (NBR): Norske Reindriftsamers Landsforbund / Norgga Boazosápmelaččaid Riikkasearvi / Nøørjen Saemiej Rijhkesiebrie lea boazosápmelaččaid nationála ealáhus- ja beroštusorganisašuvdna, vuođđuduvvon jagi 1947. NBR:s lea vuoigatvuohta šiehtadallat jahkásaš boazodoallošiehtadusa stáhtain.
NBR ráđđeaddinbálvalus areálaáššiin: Ráđđeaddinbálvalus mii addá ealáhussii fágalaš ráđiid areálaáššiin. Bálvalusat fállojit buot orohagaide ja boazoservviide Norggas, ja doaimmahuvvojit jearu vuođul.
DBS-bálvalus boazodoalu várás: DBS-ráđđeaddin lea Norsk Landbruksrådgiving (NLR) nammasaš ovttasdoaibmanfitnodaga vuollásaš bálvalus. Ráđđeaddit leat Trøndelágas ja Finnmárkkus, muhto galget leat olámuttus buot guovlluin gos lea boazodoallu.
Dearvvašvuođabálvalus bohccuid várás: Bálvalus mii galgá nannet máhtu buori elliiddearvvašvuođa ja elliidčálggu birra boazodoalus ja šibitdoaktáriid gaskkas. Boazodearvvašvuođabálvalus gullá Romssa šibitdoavtterinstituhttii.