Norggahaddi galgá sihkkarastit vuorddehahtti ja dássidis elrávdnjehattiid olbmuide

– Norggahatti ásaheamis lea sáhka das ahte addit oadjebasvuođa ja ásahit vuorddehahttivuođa olbmuid elrávdnjehattiid ektui. Odne sáddejuvvo evttohus Norggahatti birra gulaskuddamii ja mii leat lávkki lagabui ásaheami. Olbmuin lea friddjavuohta válljet Norggahatti, ja sidjiide geat eai vállje Norggahatti lea elrávdnjedoarjjaortnet ain gustovaš, dadjá energiijaministtar Terje Aasland.

Norggahaddeortnet fátmmasta ásodagaid ja astoáiggeviesuid. Sii, geaid mielas bistevaš haddi birrajagi lea buoret go dábálaš elrávdnješiehtadus elrávdnjedoarjagiin, sáhttet válljet Norggahatti.

Norggahaddi muddejuvvo jahkásaččat

Ráđđehus evttoha ahte Norggahatti dássi muddejuvvo oktii jagis, ja ahte haddi gusto ođđajagimánu 1. b. rájes juovlamánu 31. b. rádjai. 40 evresaš dássi galgá gustot golggotmánu 1. b. 2025 rájes juovlamánu 31. b. 2026 rádjai, ja vuosttaš dássemudden dahkko ođđajagimánu 1. b. 2027 rájes. Muddema vuođđun galgá leat elrávnnji boahttevuođa vurdojuvvon haddi, muhto galgá seammás fuolahit dan ulbmila ahte ortnet galgá sihkkarastit vuorddehahtti ja dássidis elrávdnjehattiid duohta historjjálaš elrávdnjehaddeovdáneami vuođul.

Geavahanrádjá

Movttiidahttin dihtii daid ruovttudoaluid main lea stuorámus geavahus, seastit elrávnnji ja beaktileappot geavahit energiija, dieđiha ráđđehus ahte áigot ásahit geavahanrájá Norggahaddái. Gulaskuddamis bivdá ráđđehus oažžut árvalusaid dasa ahte berrešii go geavahanrádjá leat 3 000, 4 000 dahje 5 000 kWh mánnui ásodagaide ja 500, 1 000 dahje 1 500 kWh mánnui astoáiggeviesuide.

Elrávdnjedoarjjaortnegis lea dál 5 000 kWh sturrosaš geavahanrádjá mánnui, ja gulaskuddamis bivdá ráđđehus oažžut árvalusaid dasa ahte berrešii go dan vuolidit 3 000 dahje 4 000 kWh sturrosažžan mánnui.

Čatnanáigi

Norggahatti šiehtadus gollá ođđajagimánu 1. b. rájes juovlamánu 31. b. rádjai juohke jagi. Kundarat sáhttet dahkat Norggahaddešiehtadusa goas beare jagis, ja sii leat dalle čadnon šiehtadussii juovlamánu 31. b. rádjai seamma jagi. Šiehtadusat mat dahkkojit golggotmánu 2025 rájes juovlamánu 2025 rádjai gustojit juovlamánu 2026 rádjai.

Oktavuohta gáidduslieggasii

Sullii 300 000 ruovttudoalu Norggas geavahit gáidduslieggasa liggemii. Ráđđehus háliida ahte singuin galgá meannudit seamma láhkai go ruovttudoaluiguin mat geavahit elrávnnji, ja evttoha dakkár gáiddusliekkasortnega mii vuhtiiváldá dan. Ortnet ii galgga čuohcat gáiddusliekkasfitnodagaide. Dárbu lea čielggadit dakkár ortnega ásaheami ja ráđđehus máhccá ruovttoluotta dasa sierra gulaskuddamis.

Ráđđehus áigu maiddái fargga mearridit rievdadusaid energiijamearkaortnegis visttiid várás. Das dahkkojit dakkár rievdadusat mat dássidit gáidduslieggasa beaktilis elfápmovuđot liggenčovdosiiguin, nu go liggenpumppain. Dat sihkkarasttášii ahte visttit mat geavahit gáidduslieggasa sáhttet oažžut energiijaárvosáni A, almmá stuorra liigeinvesteremiid haga.

Ortnega hálddašeapmi

Ráđđehusa áigumuš lea ahte Norggahaddeortnega galget neahttafitnodagat hálddašit, ja ahte kundarat mat válljejit Norggahatti dahket šiehtadusa neahttafitnodagain.

Bistu

Ráđđehus evttoha ahte Norggahaddi, dálá elrávdnjedoarjjaortnet ja lagašliekkaskundariid elrávdnjedoarjjaortnet galgá gustot juovlamánu 31. b. 2029 rádjai. Ortnet galgá evaluerejuvvot, ja ortnega vejolaš guhkideami ferte árvvoštallat fápmomárkandili vuođul, dan vuođul makkár ávki ortnegis lea leamaš ja boahtteáiggi dárbbu vuođul.

Gulaskuddanáigemearri lea cuoŋománu 21. b. 2025. 

Geavahanrájá duogáš

• 4 proseantta Norgga ruovttudoaluin geavahedje badjel 5 000 kWh ovtta dahje eanet mánuin jagi 2024.
• 8,6 proseantta Norgga ruovttudoaluin geavahedje badjel 4 000 kWh ovtta dahje eanet mánuin jagi 2024.
• 20,9 proseantta Norgga ruovttudoaluin geavahedje badjel 3 000 kWh ovtta dahje eanet mánuin jagi 2024.
• 24,3 proseantta Norgga astoáiggeviesuin geavahedje badjel 1 500 kWh ovtta dahje eanet mánuin jagi 2024.
• 49 proseantta Norgga astoáiggeviesuin geavahedje badjel 1 000 kWh ovtta dahje eanet mánuin jagi 2024.
• 77,6 proseantta Norgga astoáiggeviesuin geavahedje badjel 500 kWh ovtta dahje eanet mánuin jagi 2024.

Norggahaddi lea stáhta ruhtadanortnet, mas kunddar máksá 40 evrre juohke kWh ovddas earret momssa bistevaš haddin elrávdnjelágideamis. Lassin boahtá neahttaláigu, divadat ja lasáhusat šiehtadusas fápmolágideddjiin. Divadii gullet elrávdnjedivat, máksámušat energiijafondii ja lasseárvodivat. Dát divadat gustojit olles riikii, muhtun spiehkastagaiguin. Lasáhus šiehtadusas fápmolágideddjiin molsašuddá dan vuođul guđe elrávdnješiehtadus dus lea.