Árvala Deanučázádagas gieldit luossabivddu maiddái 2025:s
Ođas | Almmustahtton: 11.03.2025 | Dálkkádat- ja birasdepartemeanta
Deanučázádaga erenoamáš unna luossamáddodagaid geažil árvalit Norgga ja Suoma eiseválddit 2025:s guhkidit luossabivdogildosa Deanučázádagas.
Deanučázádaga luossamáddodat lea njiedjan máŋga jagi juo, ja nu dahká maiddái 2024:s. Ii goassege leat registrerejuvvon nu unnán luossa gorgŋen Detnui gođđat go diibmá.
Norgga ja Suoma ođđa bivdonjuolggadusaid vuolggasadji lea ahte luossabivddu vuođđun galgá leat luossamáddodaga bivdomuddosaš lassáneapmi. Dušše ráddjejuvvon bivdu sáhttá rahppojuvvot jus rukses máddodagaid stáhtuskategoriija oassi lea vissis áigodaga vuollel 20 %. Dát mearkkaša ahte mii leat ain guhkkin eret dan mearis goas ráddjejuvvon luossabivdu sáhttá rahppojuvvot.
Deanučázádaga luossamáddodagaid stáhtus ja vejolašvuohta rahpat ráddjejuvvon bivddu lea digaštallojuvvon Dálkkádat- ja birasdepartemeantta ja Suoma Eanan- ja meahccedoallodepartemeantta gaskasaš čoahkkimiin, gos Norgga ja Suoma beale báikkálaš vuoigatvuođalaččat maid leat leamaš fárus. Lea leamaš ovttaoaivilvuohta das ahte Deanučázádagas ii berre rahppojuvvot luossabivdu 2025:s.
Gulaskuddandokumeanttaid ja gulaskuddancealkámušaid skovi gávnnat dáppe: https://www.regjeringen.no/id3090289/
Cealkináigemearri lea njukčamánu 28. beaivi.