Ruhtaspealut Norggas
Artihkal | Maŋimuš ođasmahttojuvvon: 10.03.2025 | Kultur- ja dásseárvodepartemeanta
Bajit dási ulbmil ruhtaspeallomárkana muddemis Norggas lea eastadit speallanváttisvuođaid ja eará heajos váikkuhusaid ruhtaspealuin, ja maiddái sihkkarástit ahte ruhtaspealut čađahuvvojit vásttolaš ja oadjebas vuogi mielde. Dasa lassin galgá mudden láhčit dili nu ahte ruhtaspealuid badjebáza manná ulbmiliidda mat eai leat vuođđuduvvon dietnasiidda. Maŋit oassi lea goitge daid eará ulbmiliid vuollásaš.
Stuorimus ruhtaspealut Norggas fállojuvvojit dál oktovuoigatvuođamodealla mielde. Norsk Tippingas lea oktovuoigatvuohta fállat ruhtaspealuid, ja Stiftelsen Norsk Rikstoto ges fálla ruhtaspealuid heastagilvvohallamiin. Kultur- ja dásseárvodepartemeanttas lea ovddasvástadus Norsk Tipping AS eaiggátstivremis. Departemeanttas lea maiddái vuoigatvuohta nammadit eanetlogu miellahtuid Stiftelsen Norsk Rikstoto stivrii. Modealla galgá sihkkarastit ruhtaspeallomárkanii buori almmolaš dárkkisteami ja stivrema.
Dasa lassin addo lohpi organisašuvnnaide, mat eai leat vuođđuduvvon dietnasiidda, lágidit priváhta lotteriijaid. Čavga eavttuid vuođul lea maid vejolaš priváhtaolbmuin ja organisašuvnnain fállat unnit ruhtaspealuid almma ovddalgihtii lobi haga Lotteriija- ja vuođđudusbearráigeahčus.
Norgga ruhtaspeallanpolitihka ja dálá oktovuoigatvuođamodealla vuođđun leat dábálaččat golbma váldoeavttu maid vuhtiiváldit:
- Ahte eastada heajos speallandábiid
- Ahte eastada ekonomalaš rihkolašvuođaid
- Ahte ráddje priváhta dietnasa.
Norgga ruhtaspeallanpolitihka ulbmilat eai leat dásseárvosaččat. Ovddasvástideaddjivuohta lea ruhtaspeallopolitihka stuorimus ulbmil.