Bearráigeahčču, dárkkisteapmi ja čuovvuleapmi
Artihkal | Maŋimuš ođasmahttojuvvon: 10.03.2025 | Kultur- ja dásseárvodepartemeanta
Lotteriijabearráigeahčču ásahuvvui jagi 2001 bearráigeahččanorgánan, mii galgá hálddašit ja dárkkistit priváhta lotteriijaid ja stahtalaš spealuid. Stuoradiggi hálidii oažžut buoret goziheami lassáneaddji speallan- ja lotteriijamárkanis Norggas.
Lotteriija- ja vuođđudusbearráigeahčču dárkkista ja goziha ahte oktovuoigatvuođafállit Norsk Tipping ja Norsk Rikstoto ja priváhta lotteriijaaktevrrat čuvvot gustovaš njuolggadusaid. Dasa lassin meannuda bearráigeahčču ohcamušaid joavkkuin ja servviin mat aigot lágidit dakkár lotteriijaid, maid gávpejohtu lea badjel 200 000 ruvnno.
Lotteriijabearráigeahčču lea maid Grasrotandela bearráigeahččoorgána ja goziha ruhtaspeallansuorggi ruhtabassanlága vuođul.
Bearráigeahčus lea mávssolaš bargu eastadit heajos váikkuhusaid lotteriija- ja ruhtaspeallofálaldagain Norggas, ja vára váldit sis geain lea speallandávda. Dasa lassin galgá bearráigeahčču sihkkarastit ahte ruhtaspeallan ja lotteriijaid dienas manná ideála ulbmiliidda.
Lotteriija- ja vuođđudusbearráigeahčus leat maiddái eará doaimmat mat eai leat čadnon ruhtaspeallopolitihkkii, nugo bearráigeahččat ja dárkkistit vuođđudusaid vuođđuduslága vuođul, ja maiddái hálddašit ortnegiid mas eaktodáhtolaš searvvit ja organisašuvnnat eai dárbbaš máksit lassiárvodivada ja mas falástallanrusttegiin ožžot lassiárvodivada ruovttoluotta máksot.
Eambbo dieđut Lotteriijabearráigeahču bearraigeahččan- ja dárkkistanbarggu birra:
Speallandávda
Speallandávdda sáhttá defineret dakkár gillámuššan ahte olmmoš speallá dávjá, ja jus máŋgii leat geavvan dáhpáhusat speallamiin, mat leat váikkuhan olbmo eallimii nu ahte leat čuohcan sosiála beallái, bargui, materiála- ja bearašdilálašvuođaide.
Doaibmaplána speallanváttisvuođaid ektui áigodahkii 2022-2025 lea guđat plána jagi 2005 rájes. Doaibmaplána váldoulbmilat leat:
- Unnimus lági mielde galget leat speallanváttisvuođat
- Diehtu speallama ja speallanváttisvuođaid birra galgá lasihuvvot ja juhkkojuvvot viidát
- Ruhtaspelliid, geain leat váttisvuođat, galgá árrat identifiseret ja sidjiide addit buori divššu
Álbmotiskkadeapmi
Lotteriijabearráigeahčču čađaha jeavddalaččat álbmotiskkadeami mii guoská speallandávdii. Maŋemus iskkadeapmi almmuhuvvui 2023.
Spealat go don dahje muhtin gean dovddat ollu?
Blå Kors (Alit Ruossa) doaimmaha searválaga Lotteriija- ja vuođđudusbearráigeahčuin oktavuođatelefuvnna olbmuide geain lea ruhtaspeallanváttisvuođat. Geahča maiddái Norsk Tippinga siiddu jierpmálaš speallama birra.