Sámi kulturpolitihkka
Artihkal | Maŋimuš ođasmahttojuvvon: 13.02.2025 | Kultur- ja dásseárvodepartemeanta
Gieldda- ja guovlludepartemeanttas lea bajitdási ovddasvástádus Norgga sámepolitihkas, ja Kultur- ja dásseárvodepartemeanttas ges lea ovddasvástádus kulturpolitihkkasuorggis.
Sámi kultuvra, dáidda ja giella gullet lunddolaččat stáhta kulturpolitihkkii, muhto stáhtas lea dáid surggiin ovddasvástádus buot hálddašandásiin, nu go maiddái kultureallima aktevrrain. Buohtalasat dáinna doaimmaha Sámediggi iežas iešheanalaš kulturpolitihka stáhtabušeahta juolludeami rámmaid siskkobealde ja lea ráđđehusa guovddáš ovttasbargoguoibmi sámi dáidaga, kultuvrra ja giela hárrái.
Kulturpolitihka vuođđun sámi dáidaga ja kultuvrra hárrái lea ahte buot olbmuin lea vuoigatvuohta eaiggáduššat ja hálddašit iežaset kulturárbbi ja ahte stuoraservodaga kulturásahusain lea ovddasvástádus fátmmastit sámi dáidaga ja kultuvrra iežaset doaimmaide.
Kultur- ja dásseárvodepartemeanta fuolaha ráđđehusa sámi kulturpolitihka earret eará sámi kulturviesuid álggahan- ja huksenprošeavttaid vuoruhemiid bokte, ja ruhtajuolludemiid bokte iešguđet sámi kulturdoaimmaide.
Ruhtajuolludeamit juogaduvvojit ee. oktasaš buhtadusdoarjjaortnegiidda sámi dáiddáriid, sámi aviissaid, sámi filmmaid, sámi arkiiva ja sámi valáštallanorganisašuvnnaid várás. Dasto hálddašit maiddái muhtin Kultur- ja dásseárvodepartemeantta doarjja-/juolludusvuostáiváldit sámiide guoski dáidda- ja kultur- ja gielladoaimmaid ja aktivitehtaid. Dan dahket ovdamearkka dihtii Nationálagirjerádju, Norgga kulturráđđi ja nationála museafierpmádahkii gulli museat.
Mii čujuhat Gielda- ja guovlodepartemeantta jahkásaš almmuhussii juolludemiid birra sámi áigumušaide stáhtabušeahtas.