Sáddehat ja audiovisuála diŋgonfálaldagat
Artihkal | Maŋimuš ođasmahttojuvvon: 17.03.2025 | Kultur- ja dásseárvodepartemeanta
Sáddehat lea rádio- dahje tv-sáddagiid sádden nu ahte álbmot sáhttá oažžut sáddagiid njuolga ja buohkat oktanis. Audiovisuála diŋgonfálaldagat leat nugo fálaldagat maid váldoulbmil lea fállat prográmmaid maid geavaheaddji ieš vállje goas geahččá dahje guldala.
Sáddehatláhka
Sáddehatláhka mudde sáddehaga ja audiovisuála diŋgonfálaldagaid. Kultur- ja dásseárvodepartemeanttas lea ovddasvástádus gozihit sáddehagaid ja audiovisuála diŋgonfálaldagaid lága (sáddehatlága) ja guoskevaš láhkaásahusaid.
Láhka sisttisdoallá earret eará mearrádusaid lobi addima birra doaimmahit sáddehagaid (konsešuvdnageatnegasvuohta), ja njuolggadusaid máidnosiid, sponsema ja gálvočájehallamiid birra, viidáseappot sáddemiid birra jođasfierpmádagaid bokte, gaskkustangeatnegasvuođa birra, ja NRK organiserema bajitdási njuolggadusaid. Sáddehatlága hálddašeapmi ja goziheapmi lea eanas muddui fápmuduvvon Mediabearráigehččui.
Sáddehatláhka lea eanas hábmejuvvon riikkaidgaskasaš muddemiid vuođul, erenoamážit audiovisuála mediabálvalusaid direktiivva 2010/13/EU (AMT-direktiivva) vuođul. AMT-direktiiva regulere earret eará tv ja audiovisuála diŋgonfálaldagaid sisdoalu, ja márkanfievrredeami daid bokte. Láhkaproposišuvnna Prop. 66 LS (2023-2024) olis lea Stuoradiggi rievdadan sáddehatlága ja muhtun eará lágaid siskkildan dihte Norgga láhkii daid čađahuvvon rievdadusaid mat leat boahtán audiovisuála mediabálvalusaid jv. direktiivva rievdadusdirektiivva olis (AMT-direktiiva). Rievdadusat mielddisbuktet sáddehatlága doaibmaviidodaga viiddideami nu ahte njuolggadusat maiddái fátmmastit videojuohkinfálaldagaid, ja rievdadusat galget earret eará buorebut suddjet vahátlaš ja lobihis sisdoalu vuostá diekkár fálaldagain. Dasa lassin čavgejuvvojit audiovisuála mediafálaldagaid universála hábmema gáibádusat. Dasto čavgejuvvojit sorjjasmeahttunvuođagáibádusat Mediabearráigeahču, Dearvvašvuođadirektoráhta ja Medisiinnalaš buktagiid direktoráhta goziheamis das movt Norgga mearrádusat čuvvojuvvojit AMT-direktiivva ((EU)2018/1808) čađaheamis Norgga rievttis.
Álbmotsáddehat
Norggas lea almmolaš álbmotsáddehat (NRK). TV 2 lea dahkan soahpamuša stáhtain das ahte fállat kommersiála álbmotsáddehatfálaldagaid TV:s, mii nohká juovlamánu 31. beaivvi 2028.
Departemeanttas lea eaiggátstivrema ovddasvástádus Norsk Rikskringkasting (NRK) hárrái. NRK ruhtaduvvo stáhtabušeahta juolludemiid bokte. NRK geatnegasvuohta lea fállat álbmotsáddagiid sihke rádio, TV ja interneahta bokte. NRK almmolašsáddehatgeatnegasvuohta boahtá ovdan NRK-plakáhtas ja NRK njuolggadusain.
NRK lea organiserejuvvon oasussearvin man stáhta eaiggáduššá ollásit. NRK ásahusa generálačoahkkin lea kultur- ja dásseárvodepartemeanta kultur- ja dásseárvoministara bokte. Geassemánus juohke jagi dollojuvvo dábálaš generálačoahkkin. Prop. 1 S (2022-2023) ovdanbuvttii ráđđehusa iežas rievdadusaid NRK-plakáhttii ja evttohii NRK njealji jagi ekonomalaš stivrenláidehusaid. Stivrenláidehus guoská áigodahkii 2023 rájes 2026 rádjái.
TV 2 lea soahpan stáhtain buvttadit kommersiála almmolašsáddehatfálaldagaid TV:s áigodagas 2024 – 2028. máksu lea gitta 150 miljovnna kruvnno jagis, oktan govttolaš dietnasiin.
Almmolašsáddehatdoaibma sisttisdoallá gáibádusa fállat iežaset buvttadan riikaviidosaš ođasprográmmaid guovddáš ođasdoaimmahaga vuođul, dárogielat prográmmaid mánáide ja nuoraide, ja Norgga filmmaid ja tv-drámáid vuosttaščájehemiid. Gáibiduvvo maiddái ahte váldodoaimmahus ja guovddáš ođasdoaimmahus galgá leat unnimusat 100 km olggobealde guovddáš Oslo. TV2
lea válljen ásahit iežas doaimma Bergenii. TV2 ferte gaskkustit iežas álbmotsáddehatsisdoalu lineára tv-kanálas ja ii-lineára lávddis.
Konsešuvnnat/Doaibmalobit
Sáddehatlága mielde lea Norsk rikskringkastingas/NRK:s vuoigatvuohta doaimmahit sáddehatfálaldaga. Earát go NRK fertejit ohcat ja oažžut doaibmalobi ovdal go sáhttet doaimmahit sáddehaga dahje báikkálaš sáddehaga áibmofierpmádagas man sáddenrusttegat leat eatnamis.
Mediabearráigeahčču juolluda doaibmalobiid báikkálaš sáddehatulbmiliidda ja digitála sáddehahkii. Eambbo dieđuid dan birra gávdná Mediabearráigeahču neahttasiidduin.
Guoskevaš dokumeanttat:
- Prop. 1 S (2022-2023) For budsjettåret 2023 Utgiftskapitler: 300–353 Inntektskapitler: 3300–3339 og 5568 Dieđáhusoassi mediapolitihka birra ja NRK njealji jagi stivrenláidehusa ja njuolggo mediadoarjaga birra (girjedárogillii)
- Meld. St. 17 (2018–2019) Mangfald og armlengds avstand — Mediepolitikk for ei ny tid (girjedárogillii)
- St. 15 (2016-2017) Eit moderne og framtidsretta NRK - Finansiering og innhaldsplikter ) St,dikki dieđáhus(2016.2017) NRK mii lea ođđaáigásaš ja gárvvis boahtte áigái NRK – Ruhtadeapmi ja sisdoallogeatnegasvuođat (ođđadárogiella)
- St. 14 (2016-2017) Kom15 kommersiell allmennkringkaster (St.diggedieđáhus 14 (2016-2017) Kom 15 kommersiála álbmotsáddehat) (girjedárogillii)
- St. 38 (2014-2015) Open og opplyst - Allmennkringkasting og mediemangfold (St.digge dieđáhus 38 (2014-2015) (St.diggedieđáhus 38 (2015-2015) Rabas ja čuvgehuvvon – Álbmotsáddehat ja mediagirjáivuohta) (ođđadárogillii)
- St. 24 (2014-2015) Rammevilkår for lokalradio i samband med digitaliseringa av radiomediet (St.diggedieđáhus 24 (2014-2015 Báikkálaš rádio rámmaeavttut rádiomediija digitaliserema oktavuođas) (ođđadárogillii)
- St. 8 (2010-2011) Digitalisering av radiomedia (St.diggedieđáhus 8 (2010-2011) Rádiomedia kommersialiseren)(ođđadárogiella)