Miljø og helse
Artikkel | Sist oppdatert: 21.01.2025 | Helse- og omsorgsdepartementet
Eit helsefremjande miljø er ein viktig føresetnad for god helse. Gode stader, nærmiljø og lokalsamfunn har stor betydning for folks liv i kvardag og fritid, for sosialt samvær, livskvalitet og helse. Negative miljøpåverknader som luftforureining, støy, miljøgifter og stråling kan forårsake og forsterke utviklinga av sjukdomar som kreft, luftvegssjukdomar og allergiar.
Helsefremjande miljø og trygge miljø gir god helse og livskvalitet, og vil samtidig bidra til å førebygge sjukdom og skadar.
Gjennom å legge til rette for fysisk og sosial aktivitet, trygg tilkomst til skule og fritidsaktivitetar og daglege gjeremål, gjere sunne val lettare tilgjengeleg for alle og å skape gode sosiale møteplassar, legg ein grunnlaget for eit sosialt berekraftig lokalsamfunn.
Ein sentral plass
Folkehelsa har ein sentral plass i kommunal og regional planlegging og utvikling, så vel som i næringspolitikken, i samferdselspolitikken og i arbeid for ei meir aktivitets- og aldersvennleg nærmiljøutvikling.
Ein viktig del av folkehelsepolitikken er å fremje folkehelsa og livskvaliteten og samtidig verne folket mot miljøfarar som støy, luftforureining, miljøgifter, stråling, risiko for ulykker og skadar og for dårleg inneklima.
Miljøretta helsevern
Ansvar og myndigheit for fagområdet miljøretta helsevern er lagt til kommunen med heimel i folkehelselova sitt kapittel 3.
Miljøretta helsevern er eit tenesteområde som gir kommunen eit heilskapleg ansvar for eit trygt og helsefremjande miljø.
To ulike linjer
Tradisjonelt har det vore to hovudlinjer å jobbe langs innan miljøretta helsevern. Langs den eine linja finn vi dei kontroll- og tilsynsoppgåvene som ligg i folkehelselova sitt kapittel 3.
Forskriftene gir detaljerte regler for krav til eigedom og verksemder, og gir kommunen verktøy til å føre tilsyn og behandle søknader om godkjenning.
Langs den andre linja finn vi oppgåver som planlegging og utvikling, noko som inkluderer folkehelsearbeid. Dette omfattar oversikt over helsetilstanden i kommunen, medverknad til å ta helsemessige omsyn i avgjerdsprosessar, gi råd og uttaler, og delta i plan- og samarbeidsorgan.
Relevante forskrifter
Miljøretta helseverntenesta i kommunane er ei viktig oppgåve og ressurs i det breie folkehelsearbeidet. Tenesta har si merksemd retta mot heile befolkninga, og ho er både sektorovergripande og gir kommunen verkemiddel overfor verksemd og eigedom, både privat og offentleg.
Miljøretta helsevern og folkehelselova sitt kapittel 3 inngår som eit sentralt verkemiddel i kommunane sitt heilskaplege folkehelseansvar. Det er med heimel i folkehelselova kapittel 3 gitt ei rekke forskrifter:
- Forskrift om helse og miljø i barnehager, skoler og skolefritidsordninger (lovdata.no)
- Forskrift om miljøretta helsevern (lovdata.no)
- Drikkevannsforskriften (lovdata.no)
- Forskrift om smittefarlig helseavfall (lovdata.no)
- Forskrift om skadedyrbekjempelse (lovdata.no)
- Forskrift for badeanlegg, bassengbad og badstu (lovdata.no)
- Forskrift om hygienekrav for frisørvirksomhet m.v. (lovdata.no)
- Forskrift om tvangsmulkt, folkehelseloven (lovdata.no)
Folkehelselova gir i kapittel 15 (miljøretta helsevern) og i kapittel 22 (merknader til dei enkelte føresegnene) ei nærare utgreiing for fagområdet miljøretta helsevern.