Rekrutteringsprosessen

Alle ledige stillingar blir publiserte på Jobbnorge (jobbnorge.no). Vi annonserer alle utlysingar på finn.no og vår Linkedin-profil. Ledige stillingar ligg ute i minst 14 dagar.

Vi får ofte mange søknader til våre ledige stillingar. Vi vil derfor oppmode deg til å fylle ut CV-en din i Jobbnorge-portalen framfor å legge den ved som vedlegg. I tillegg er det viktig å bruke søknadsteksten til å skrive kva som er motivasjonen din for å søke på stillinga og kvifor du kan vere rett kandidat.

Vi oppmodar deg til å legge ved vitnemål og attestar. Du kan laste opp resultat frå høgare utdanningsstader i Noreg frå Vitnemålsportalen (vitnemalsportalen.no) til Jobbnorge.

Vi meiner at inkludering og mangfald er ei styrke. Vi ønsker medarbeidarar med ulike kompetansar, fagkombinasjonar, livserfaring og perspektiv for å bidra til endå betre oppgåveløysing. Vi vil legge til rette for medarbeidarar som har behov for dette. 

Aktuell tilrettelegging kan til dømes vere tekniske hjelpemiddel, tilpassing av møblar eller endring av rutinar, arbeidsoppgåver og arbeidstid. Dersom det er kvalifiserte søkarar med funksjonsnedsetting, hol i CV-en eller innvandrarbakgrunn, skal vi kalle inn minst éin søkar i kvar av desse gruppene til intervju. For å bli vurdert som søkar i desse gruppene, det vil seie positivt særbehandla, må søkarane sjølve krysse av for det og oppfylle visse krav. Du kan lese meir om krava på Arbeidsgiverportalen (dfo.no).

Vi oppmodar søkarar til å krysse av i Jobbportalen dersom dei har funksjonsnedsetting, hol i CV-en eller innvandrarbakgrunn. Avkryssingane i jobbsøkarportalen dannar grunnlag for anonymisert statistikk som alle statlege verksemder rapporterer i sine årsrapportar.

Intervju blir gjennomførte kort tid etter søknadsfristen er ute. Dersom du blir invitert til intervju, vil du bli kontakta via e-post eller telefon. Under sjølve intervjuet vil du få informasjon om den vidare rekrutteringsprosessen. Det blir normalt gjennomført første- og andregongsintervju.

Intervju blir gjennomførte på ulike måtar. Det blir ofte brukt ei munnleg eller skriftleg fagleg relevant oppgåve som ein del av rekrutteringsprosessen. Det varierer kor i prosessen ei slik oppgåve blir gitt, men alle kandidatane får beskjed på førehand og lik tid til eventuelle førebuingar.

Av og til blir det også brukt evnetest eller personlegdomstest. Vi bruker enten personlegdomstesten MAP som bygger på den etablerte femfaktormodellen. Dei fem overordna faktorane som blir målte er målbevisstheit, emosjonell balanse, openheit, ekstroversjon og sosial stil. Kandidatane som gjennomfører ein personlegdomstest vil få tilbakemelding av testrapporten frå sertifiserte testarar. Evnetesten vi bruker heiter Matrigma og er ein problemløysingstest som måler generelt evnenivå.

I løpet av intervjurunden vil vi be deg om å oppgi referansar dersom det ikkje er gjort i søknaden. Vi avklarer med deg før vi eventuelt kontaktar referansane dine.

I Helse- og omsorgsdepartementet blir gradert informasjon behandla etter tryggingslova. Alle som blir tilsette i departementet må kunne autoriserast for å få tilgang til informasjon gradert etter tryggingslova. Derfor har vi i alle utlysingar følgjande krav: «Den som blir tilsett må kunne autoriserast for behandling av informasjon gradert BEGRENSET eller høgare etter tryggingslova».

For at autorisasjon skal bli gitt, må vedkommande vurderast som tryggingsmessig skikka. For å vurdere om ein person er tryggingsmessig skikka, blir det gjennomført ein autorisasjonssamtale der det blir lagt vekt på forhold som er relevante for personens pålitelegheit, lojalitet og dømmekraft i samband med behandling av gradert informasjon. Autorisasjonssamtalane blir utførte i tråd med verksemdstryggingsforskrifta § 68 jf. tryggingslova § 8-9.

Fleire stillingar i departementet krev at den som blir tilsett er tryggleiksklarert. I slike tilfelle vil det bli opplyst om i stillingsannonsen, også kva klareringsnivå det blir stilt krav om. Klareringssaker blir behandla av Sivil klareringsmyndighet etter oppmoding frå Helse- og omsorgsdepartementet.

Etter at intervju er gjennomført og referansar er innhenta, blir det utarbeidd ei innstilling med ei grunngitt rangering av kandidatane som blir innstilte til stillinga. Vedtak i tilsettingssaker skjer i Helse- og omsorgsdepartementet sitt innstillingsråd. Innstillingsrådet består av representantar frå leiinga og fagforeiningane.

Etter at innstillinga er vedtatt i innstillingsrådet, blir den aktuelle kandidaten kontakta. Kandidaten mottar eit tilbodsbrev med opplysningar om lønn og øvrige tilsettingsvilkår. Vi ønsker normalt eit svar på tilbodet i løpet av 5 kalenderdagar. Alle øvrige søkarar vil få tilsendt ein e-post om utfallet av rekrutteringsprosessen.

Som søkar har du på førespurnad krav på å få tilsendt utvida søkarliste med opplysningar om søkarane sitt namn, alder, utdanning og praksis. Vi gjer merksam på at opplysningar om ein søkar kan bli offentleggjort sjølv om søkaren ber om ikkje å bli ført opp på ei offentleg søkarliste. Då får du som søkjar beskjed om det. For øvrig viser vi nærmare til reglane om partane sitt innsyn i tilsettingssaker i forvaltningslovforskrifta (lovdata).

Vi gjennomfører bakgrunnssjekk i samarbeid med Semac. Det gjer oss sikrare på at vi rekrutterer rett kompetanse og bidrar til ei rettferdig evaluering av søkarar til stillingar. Semac gjennomfører på våre vegner ein systematisk kjelde- og dokumentkontroll av opplysningar søkarar gir om utdanning og arbeidserfaring. Det blir ikkje innhenta informasjon utan samtykke frå kandidaten.

Som nytilsett i Helse- og omsorgsdepartementet er det mykje å lære. Du får ein fadder i avdelinga di, og tilbod om ulike introduksjonskurs. Tilboda består av samlingar internt, e-læringskurs og kurs eksternt.

Fellesnemnaren er at du får opplæring i eit sett av basiskunnskapar som er viktige for å kunne gjere ein god jobb i departementet og for å forstå den rolla du og departementet har. Deltakarane blir kjende med dei mest sentrale områda i departementet, og med ønskte verdiar og haldningar knytte til det å vere tilsett hjå oss.