Korleis er det å jobbe hjå oss?
Artikkel | Sist oppdatert: 05.02.2025 | Helse- og omsorgsdepartementet
Vi veit at vi har tilsette som trivst. Vi veit også at det er fordi dei får faglege utfordringar og har eit godt arbeidsmiljø. Difor arbeider vi kontinuerleg med dette.
Kven er vi som jobbar i Helse- og omsorgsdepartementet (HOD)?
I HOD er vi rundt 240 tilsette, fordelt på ulik alder og bakgrunn. Vi er eit høgt utdanna departement, der dei fleste har mastergrad. Dei vanlegaste utdanningsbakgrunnane hjå oss er juristar, statsvitarar, samfunnsvitarar og økonomar, men vi har også mange tilsette med helsefagleg bakgrunn.
Vi er i dag organiserte i sju avdelingar som blir leia av ekspedisjonssjefar og deira avdelingsdirektørar. Avdelingane er organiserte etter både sektorområde og tverrgåande verkemiddel, noko som krev mykje og godt samarbeid på tvers.
Arbeidsmiljø og kultur
Helsepolitikk angår alle og engasjerer mange. Som tilsett i Helse- og omsorgsdepartementet får du jobbe i skjeringsfeltet mellom fag og politikk i ein sektor med høg politisk merksemd. Helse- og omsorgssektoren er landets største beredskapsressurs.
Helse- og omsorgsdepartementet styrer det førebyggande beredskapsarbeidet og koordinerer handteringa av kriser i sektoren. Departementet har ei 24/7 beredskapsvaktordning og jamlege møter i kriseleiinga.
HOD er ein travel og spennande arbeidsplass med god trivsel og «kort veg» til politisk leiing. Arbeidsoppgåvene er utfordrande og nye medarbeidarar får raskt arbeidsoppgåver der dei må nytte sin kompetanse til å vurdere og analysere faglege problemstillingar. I tillegg til godt fagleg samarbeid og motiverte tilsette, legg vi til rette for at folk skal trivst her. Vi har nye, lyse kontorlokale med eige treningsrom og takterrasse, og har ein eigen velferdskomité som arrangerer både små og store arrangement for våre tilsette.
Som tilsett i Helse- og omsorgsdepartementet kan du få:
- Ein meiningsfull jobb med interessante oppgåver
- Faglege utfordringar innan helsepolitiske saker
- Kurs, seminar og hospiteringsordningar slik at du får fagleg utvikling
- Eit godt arbeidsmiljø
- Fleksibel arbeidstidsordning
- Sosiale aktivitetar
- Sommartid frå mai til september
- Gode pensjonsordningar
- Trening i arbeidstida (to timar per veke)
- Treningsrom
- Eiga bedriftshelseteneste
Vi held til i eit nytt, moderne bygg sentralt i Oslo, rett bak Tinghuset.