ETS2
Vil fullføre den nasjonale gjennomføringa av det nye klimakvotesystemet
Nyheit | Dato: 04.04.2025 | Klima- og miljødepartementet
Regjeringa legg til rette for å gjennomføre resterande delar av EUs klimakvotesystem for vegtransport, bygningar og andre utvalde sektorar (ETS2) i norsk rett.
I lovforslaget regjeringa i dag legg fram, ber regjeringa Stortinget om å gi heimel til å fullføre den nasjonale gjennomføringa av det nye klimakvotesystemet.
– Eg er nøgd med at vi no kan få på plass dei siste delane av desse klimakvotereglane i norsk rett. Målet er å kutte utslepp og omstille norsk økonomi. Det er også viktig at vi følgjer opp klimaforpliktingane vi har i EØS-avtala, seier klima- og miljøminister Andreas Bjelland Eriksen.
EU har innført eit nytt kvotesystem for klimagassutslepp frå forbrenning av brensel i vegtransport, bygningar og andre utvalde sektorar. Ordninga vert omtalt som ETS2. Reglane stammar frå EU sitt forsterka klimakvotedirektiv, som vart innlemma i EØS-avtala i desember 2023.
ETS2 skal gjere forureining dyrare, slik at det blir meir lønsamt å bruke reinare energi.
FAKTA
Om ETS2
- ETS2 fungerer som ein eigen kvotemarknad med eit eige kvotetak. Det kjem ved sidan av kvotesystemet for industri og kraftproduksjon, luftfart og maritim transport, som gjerne vert omtalt som EU ETS eller ETS1.
- Dei føreslåtte lovendringane inneber at verkeområdet til klimakvoteloven vert utvida til å gjelde aktivitetane og pliktsubjekta som er omfatta av ETS2.
- Regjeringa foreslår òg endringar for at klimakvoteloven sine generelle reglar for tilsyn, forvaltingstiltak og sanksjonar skal gjelde både for ETS1 og ETS2.
- Lovendringane i forslaget skal leggje til rette for at dei resterande reglane knytt til ETS2 i EU sitt forsterka klimakvotedirektiv kan bli gjennomførte ved etterfølgjande forskriftsendringar.
- Dei naudsynte forskriftsendringane er planlagt gjennomført i klimakvoteforskriften innan 1. oktober 2025. For at dette skal vere mogleg, vil Stortinget måtte vedta proposisjonen i løpet av vårsesjonen 2025.
- Dei fyste delane av regelverket for ETS2 begynte å gjelde allereie i 2024 og 2025, og vart derfor gjennomført i norsk rett sommaren 2024. Dette er blant anna krav om løyve for utslepp for å kunne omsetje brensler som omfattast av ETS, og overvaking og rapportering av utslepp.
Lovforslaget skal òg gi heimel til å innføre krav til at operatørar luftfartøy må overvake og rapportere såkalla «ikkje-CO2 effektar» på klimaet. Dette er klimaeffektar som skuldast noko anna enn utslepp av CO2, til dømes kondensstripar og utslepp av nitrogenoksidar (Nox) og sotpartiklar. Frå 1. januar 2025 må operatørar av jetfly overvake og rapportere slike effektar. EU vil i 2028 vurdere om det òg skal bli plikt til å innlevere kvotar som følgje av ikkje-CO2 effektar på klimaet.