Uusi toimiplaana kväänin kielele
Pressemelding | Dato: 14.03.2025 | Kommunal- og distriktsdepartementet
Hallitus alkkaa työn ette saahaan uusi toimiplaana kväänin kielele. Toimiplaana oon osa sitä kuoraamistyötä jonka oon tehty sen jälkhiin ko Isotinka käsitteli Tottuuen- ja sovinonkommisuunin raportin.
Bokmål | Kvensk
– Tottuuen- ja sovinonkommisuuni oon dokumenteerannu perustheelisesti net vakavat konsekvensit jokka kväänit/norjansuomalaiset saathiin norjalaistamisen tähen. Monet heitethiin puhumasta heän kieltä. Se ei ole eppäilystä siitä ette se oon tarvet pitkälisele satsaukselle niin ette met saama enämen kväänin kielen käyttääjiitä, sannoo komunaali- ja distriktiministeri Kjersti Stenseng.
Isotinka pyyttää heän kehoituspäätöksissä ette hallitus laittaa velvoittaavat toimiplaanat joitten avula lujitethaan kielet jokka jou’uthiin norjalaistamisen alle. Kommunal- og distriktsdepartementila oon eesvastaus tästä päätöksestä, ja se aikkoo kuorata tätä yhessä Kunnskapsdepartementin ja Kultur- og likestillingsdepartementin kans. Uusi toimiplaana kväänin kielele oon kans yhtheyessä siihen ette muitaki kehoituspäätöksiitä kuurothaan.
Hallitus halluu kuttuut kväänin faakimiljööt ja organisasuunit myötä tähän työhön.
– Kvääniiltä oon tullu selvä toivet ette se tulis uusi toimiplaana. Mie olen sen tähen iloinen ette met saatama julistaat justhiinsa tääpänä ette met alama työn uuen kväänin kielen toimiplaanan kans, sannoo Stenseng.