Stadig fleire tek fagskuleutdanning

– Denne regjeringa satsar på fagskulane – ein juvel i utdanningssystemet vårt. For å lukkast med den grøne og digitale omstillinga vi skal gjennom, er vi heilt avhengige av fagskulane. Dei gir praksisnære, korte utdanningar som er tett på arbeidslivet. Vi har til no bidrege med 2 000 nye studieplassar til fagskulane, slik at dei kan møte kompetansebehov i heile Noreg, seier forskings- og høgare utdanningsminister Sigrun Aasland (Ap).

Tilstandsrapporten for høgare yrkesfagleg utdanning viser utviklinga i fagskulesektoren:

• Dei mest populære fagområda er tekniske fag (43 prosent av studentane), og helse- og velferdsfag (25 prosent av studentane).
• Studentane ved fagskulane har samla sett vorte eldre, og har no ein snittalder på 34 år. Sidan 2017 har snittalderen auka med 3 år.
• Over halvparten av studentane blei i 2024 tekne opp på grunnlag av yrkesfagleg kompetanse. 23 prosent blei tekne opp på grunnlag av realkompetanse, som er 30 prosent fleire enn året før.

Fleire vel fleksible studiar

Studentane ved fagskulane har ofte lang arbeidserfaring og studerer ved sidan av jobb. 72 prosent av studentane følgde nett- eller samlingsbaserte utdanningar ved fagskulane i 2024. 74 prosent var deltidsstudentar, men det er store forskjellar mellom dei ulike fagområda. Fleire av utdanningane er kortare løp tilpassa folk i arbeid.

– At ein stadig større del studerer på deltid eller på andre former for fleksible utdanningar, tyder på at vi lukkast med målet om tilgjengelege utdanningstilbod som er lausrivne frå geografi og livssituasjon, seier Sveinung Skule, direktør i Direktoratet for høgare utdanning og kompetanse.

• Les meir om rapporten og resultata (hkdir.no)

Regjeringa satsar på fagskulane

Våren 2025 la regjeringa fram ei stortingsmelding om høgare yrkesfagleg utdanning. Meldinga vart behandla av Stortinget i mai. Regjeringa vil løfte fagskulane gjennom styrkt finansiering, meir handlingsrom for fagskulane og fleire karrierevegar for fagarbeidarar.

– Med mindre detaljstyring og meir pengar vil fagskulane no få større fridom og betre moglegheiter til å tilpasse utdanningstilboda til skiftande behov i arbeidslivet, seier Aasland (Ap).