Reviderte vilkår for Svorkareguleringa

Miljøtilstanden blir betra ved pålegg om minstevassføring i nedre delar av Bøvravassdraget for å gi betre tilhøve for villaks og sjøaure, samstundes som dei opphavlege konsesjonsvilkåra vert oppgraderte til dagens standard. Det er ikkje innført krav om minstevassføring i øvre delar av Bøvravassdraget, slik både kommunen og friluftsorganisasjonane har kravd.

– Ved å innføre krav om minstevassføring i nedre delar av Bøvra, tek me naudsynte grep for å betre leveforholda for villaks og sjøaure. Med den kunnskapen vi no har, vil krav om minstevassføring i øvre delar av vassdraget til Litlbøvra gi eit for høgt tap av fornybar kraftproduksjon og redusere flaumdempingseffekten magasina har, utan at det vil føre til ein betydeleg positiv gevinst for villaksen. Regjeringa har difor ikkje pålagt slepp av vatn på dette strekket, seier energiminister Terje Aasland.

Reguleringa i Bøvravassdraget vert nytta i Svorka kraftverk som har ein årleg produksjon på om lag 121 GWh og ein installert effekt på 25 MW. Dei nye vilkåra inneber at det skal sleppast vatn i Bøvra nedstraums Svorka kraftverk heile året, med ei vassføring på 2,85 m³/s i sommarhalvåret og 1,55 m³/s i vinterhalvåret. Dagens praksis med ei nedkøyringshastigheit frå full drift til stopp av kraftverket på tre timar blir stadfesta. Dette sikrar at kraftverket kan behalde den viktige rolla si i kraftsystemet, samtidig som det vert tatt omsyn til vassdragsmiljøet. Dei nye vilkåra vil gi eit samla årleg krafttap på om lag 4,5 GWh.

Nordmarka i Surnadal er eit populært område for fiske og friluftsliv, og det har kome krav om sommarvasstand i fleire av magasina. Det vert ikkje innført magasinrestriksjonar av omsyn til den regulerbare og fleksible kraftproduksjonen.

– Eg har gjort ei grundig vurdering av både dei miljømessige og økonomiske konsekvensane knytt til Svorkareguleringa. Målet er å oppnå eit fungerande økosystem i Bøvra, samtidig som me held oppe ein stabil og regulerbar kraftproduksjon, seier Aasland.

I åra framover skal konsesjonsvilkåra for fleire vassdrag reviderast. Pålegg om minstevassføring og magasinrestriksjonar vil kunne bli fastsett i dei sakene der det gir størst miljøgevinst. Kostnaden i form av redusert regulerbar kraftproduksjon vil bli vektlagt i desse prosessane.

Etter vassdragsreguleringslova § 8 kan tidlegare gitte tidsuavgrensa konsesjonar reviderast 50 år etter at dei blei gitt, og deretter kvart 30. år. Reglane om revisjon gjer det mogleg å setje nye vilkår for å rette opp skadar og ulemper for allmenne interesser som har oppstått som følgje av vassdragsreguleringar. Representantar for allmenne interesser knytt til vassdraga, som til dømes miljøorganisasjonar og kommunar, kan be om at det skal setjast i gang ein revisjon.

Her kan du lese den kongelege resolusjonen som er knytt til denne saka:

• Statkraft og Svorka Energi AS - Revisjon av konsesjonsvilkår for Svorka kraftverk, Surnadal kommune, Møre og Romsdal.pdf