Regjeringa foreslår endringar i regelverket for familieinnvandring og permanent opphaldsløyve
Nyheit | Dato: 10.04.2025 | Justis- og beredskapsdepartementet
Regjeringa legg i dag fram ein lovproposisjon med forslag til endringar i reglane om foreldre og søskens rett til familiegjenforeining med mindreårige som har fått vern (asyl eller kollektivt vern) i Noreg. Forslaget skal mellom anna forhindre at det blir gitt opphaldsløyve der det vil føre til utøving av bigami i Noreg.
Regelverket i dag er ikkje til hinder for at ein forelder kan få opphald med fleire samlivspartnarar når vedkommande søkjer om familiegjenforeining med barn som har fått vern i Noreg. Mangelen på effektive avslagsheimlar i tilfelle kor opphaldsløyve til foreldre vil føre til utøving av bigami, kan gjere det meir attraktivt for foreldre å sende barn på flukt åleine til Noreg.
Hensikten med lovforslaget er å signalisere at det ikkje løner seg å sende sårbare barn ut på ei farefull ferd åleine for å sikra at ein forelder, typisk far, kan få opphald med fleire samlivspartnarar i Noreg.
I proposisjonen blir det også foreslått endringar i vilkåra for rett til permanent opphaldsløyve, mellom anna for å kunne leggje til rette for automatisert sakshandsaming i utlendingsforvaltninga. Vidare foreslår regjeringa endringar i utlendingslova sine reglar om behandling av personopplysningar, for å kunne leggje til rette for automatisert sakshandsaming av søknadar om stønad til flyktningar som ønskjer å flytte tilbake til heimlandet.
Når utlendingsforvaltninga no står overfor ei digital utvikling, er det viktig at regelverket ikkje er til hinder for at offentleg sektor og samfunnet elles kan dra nytte av dei moglegheitene og fordelane som følgjer av digitalisering.