Nytt verktøy til kommunane for å kutta utslepp frå byggje- og anleggsplassar
Nyheit | Dato: 03.04.2025 | Klima- og miljødepartementet
Regjeringa styrkar kommunane si verktøykasse i klimaarbeidet. Kommunar som ønskjer det, kan no stille krav til både offentlege og private byggje- og anleggsverksemd for å redusere klimagassutslepp.
– Vi skal nå klimamåla våre, vi skal omstille oss, og vi skal auke tempoet i å kutte klimagassutslepp. Kommunane er viktige i denne omstillinga, og i dag gir vi dei eit nytt verktøy for å redusere klimagassutsleppa frå byggje- og anleggsplassar, seier klima- og miljøminister Andreas Bjelland Eriksen (Ap).
Mange kommunar har store utslepp frå byggje- og anleggssektoren. Samstundes har fleire kommunar ambisjonar om at byggje- og anleggsplassane på sikt skal bli utsleppsfrie. Fram til i dag har kommunane berre kunna stille klimakrav i eigne anskaffingar, men ikkje til privat eller statleg byggje- og anleggsverksemd. No blir dette endra.
– Vi har lytta til kommunane, og vi vil leggje til rette for at ambisiøse kommunar kan avgrense utsleppa frå byggje- og anleggsverksemd for å nå sine klimamål. Viss mange kommunar stiller klimakrav, vil dette kunne bidra til auka etterspørsel og utrulling av utsleppsfrie løysingar over heile landet, seier Bjelland Eriksen.
Det vil vere opp til kommunane å utforme og vedta lokale klimakrav.
- Med den nye heimelen kan kommunane nå velgje å påby bruk av nullutsleppsløysingar og biogass inne på byggje- og anleggsplassar. Det vil vere opp til kommunane å utforme og vedta lokale klimakrav, og kommunane må vedta slike klimakrav som ei forskrift.
- Kommunane skal tilpasse krava sine til lokale forhold og føresetnader. Dette inneber at kommunen blant anna kan vurdere om krava skal gjelde for bestemte eller avgrensa område i kommunen og om krava berre skal gjelde for prosjekt over ein viss storleik. Vidare avgjer kommunen sjølv kor stor del av energibruken som skal vere utsleppsfri, og om krava skal innførast gradvis.
- Miljødirektoratet har fått i oppdrag å rettleie kommunar som ønskjer å ta i bruk heimelen, og vil om kort tid publisere rettleiingsmateriell på sine nettsider.