Norgesmøllene og Coop Extra gjer det lettare å velje sunt
Nyheit | Dato: 19.03.2025 | Helse- og omsorgsdepartementet
Norgesmøllene og Coop Extra er vinnarar av Helse- og omsorgsdepartementet sine utmerkingar for sunnare kosthald 2024. Norgesmøllene vann i kategorien «sunnare produkt» med grovare brødmiksar, mens Coop Extra vann i kategorien «sunnare marknadsføring» med frukt- og grøntkampanjen «Alltid 8».
– Vi ønsker at folk skal ete meir av grove kornprodukt. Då er det eit godt bidrag at aktørar som Norgesmøllene utviklar grovare brødmiksar som er attraktive både for unge og eldre, seier helse- og omsorgsminister Jan Christian Vestre.
I kategorien «sunnare marknadsføring» vann Coop Extra med sitt konsept «Alltid 8» som skal fremje inntak av frukt og grønt gjennom rabatterte prisar og målretta marknadsføring.
– Vi et for lite frukt og grønt i Noreg. Derfor er tiltak som kan gjere det enklare å velje frukt og grønsaker viktige. Dei vil kunne gi helsegevinstar for befolkninga på lang sikt, seier helse- og omsorgsministeren.
Vinnarane blei kåra på #MerAv-seminaret onsdag 19. mars, arrangert av Sjømat Norge, Frukt- og Grønnsaksgrossistenes Forening og Baker- og Konditorbransjens Landsforening på UMAMI Arena, Nova Spektrum i Lillestrøm.
Finalistane i kategorien sunnare marknadsføring var (i alfabetisk rekkefølge):
- Coop med Alltid 8
- ISS med Våre grønne helter
- REMA 1000 med Idrettsprofiler på SoMe
Grunngiving
Dei tre finalistane har brukt kreative løysingar for å promotere sunnare kosthald.
Pris er avgjerande for kva forbrukarane puttar i handlekorga. Kampanjar som vinnarane frå Coop sin Alltid 8, kor ein alltid tilbyr eit utval på åtte frukt- eller grønnsaksprodukt til rabatterte prisar, bidrar til å auke forbruket av frukt og grønsaker.
Konseptet til ISS Våre grønne helter er eit døme på at inspirasjon og informasjon om utvalde sunnare råvarar gir vekst.
Den tredje nominerte var REMA 1000, som gjennom sitt samarbeid med kjente idrettsprofilar- og forbund, bruk av digitale kanalar og utdeling av frukt og grønsaker på idrettsarrangement, når yngre kundegrupper med informasjon om viktigheita av eit kosthald rikt på frukt og grønsaker.
Finalistane i kategorien sunnare produkt var (i alfabetisk rekkefølge):
- Fjordland med Bremykt mykere
- Norgesmøllene med Møllerens brødmikser
- UNIL med First Price hjerteformede fiskekaker
Grunngiving
I denne kategorien var det mange gode kandidatar som kan bidra til sunnare mattilbod.
Fjordland med Bremykt mykere legg til rette for eit kosthald med mindre metta feitt, mens vinnarane frå Norgesmøllene har utvikla mjølblandingar som skal gjere det enklare å bake grovt brød heime.
First Price med Hjerteformede fiskekaker kan ein ete både varme og kalde, noko som legg til rette for at ein kan ete fisk ved fleire høve.
- Kristin Hollung frå Nofima, juryleder
- Lars Erling Olsen frå Handelshøyskolen BI
- Nanna Lien frå Universitetet i Oslo
- Annechen Bahr Bugge frå Oslo Met
Helsedirektoratet har sekretariatsfunksjon for utmerkingane, men sit ikkje i juryen.
Om Helse- og omsorgsdepartementet sine utmerkingar
Helse- og omsorgsdepartementet skal fremje arbeidet som blir gjort i tilknyting til intensjonsavtalen om tilrettelegging for eit sunnare kosthald. Utmerkinga skal gi ekstra merksemd til aktørar som gjer ein særleg innsats for å utvikle og/eller marknadsføre sunnare mat- og drikkevarer slik at det blir lettare for forbrukarane å ta gode val og ete sunt.
Intensjonsavtalen for eit sunnare kosthald er ein samarbeidsavtale mellom helsemyndigheitene og matbransjen for å betre kosthaldet i befolkninga, og varer til 31. desember 2025.