Løyve til å bygge Blåfalli Fjellhaugen kraftverk i Kvinnherad kommune

– Blåfalli Fjellhaugen kraftverk gir auka fornybar kraftproduksjon ved å optimalisere nytten av vasskraftressursane i eit allereie regulert vassdrag, seier energiminister Terje Aasland.

Blåfalli Fjellhaugen kraftverk er planlagt bygd i fjell med inntak i det eksisterande reguleringsmagasinet Midtbotnavatnet. Ved å gi konsesjon til kraftverket vert det lagt til rette for ei meir effektiv samla utnytting av ressursane i det allereie utbygde Blådalsvassdraget.

– Regjeringa vil legge til rette for å auke norsk vasskraftproduksjon gjennom gode prosjekt og effektiv sakshandsaming. Derfor er det ei gledeleg kindereggløysing å kunne gi løyve til dette prosjektet. Blåfalli Fjellhaugen kraftverk bidreg med meir effekt inn i kraftsystemet, det gir mindre negative miljøverknader i vassdraget totalt sett og det gir meir fornybar og regulerbar kraftproduksjon, seier Aasland.

Ein god prosess med lokale partar og eit godt kunnskapsgrunnlag har gjort at Sunnhordland Kraftlag no får dei løyva dei treng for å kunne bygge Blåfalli Fjellhaugen kraftverk. Energidepartementet har hatt saka til behandling etter at Noregs vassdrags- og energidirektorat (NVE) sendte si innstilling til departementet i desember 2024.

Her kan du lese den kongelege resolusjonen som er knytt til denne saka: 

• Blåfalli Fjellhaugen kraftverk i Kvinnherad kommune.pdf