Klima- og miljøministeren inviterer offentlege verksemder til å bli med i plastpartnarskapet

– Plastforureining er ei av dei største miljøutfordringane i vår tid. Difor inviterer vi no offentlege verksemder til å bli med på laget for å redusere bruken av eingongsprodukt i plast, seier klima- og miljøminister Andreas Bjelland Eriksen.

Plastpartnarskapet blei etablert i april 2024 og skal bidra til å nå det nasjonale målet om å halvere forbruket av eingongs drikkebeger og matbehaldarar laga av plast.

– Ved å redusere bruken av eingongsprodukt laga av plast i kvardagen, kan offentlege verksemder ta ei viktig rolle i det grøne skiftet. Dette handlar både om å utnytte ressursane våre betre, og om å dra vår del av lasset saman med næringslivet , seier klima- og miljøministeren.

Ved å slutte seg til partnarskapet forpliktar verksemdene seg til å jobbe aktivt for å redusere forbruket av eingongsprodukt og rapportere på eigne tiltak og resultat. Dei får også tilgang til ein arena for erfaringsdeling og kompetanseutveksling.