Klart for Bypakke Kristiansund
Pressemelding | Dato: 04.04.2025 | Samferdselsdepartementet
– Med denne bypakka kjem det prosjekt og tiltak både på riksveg, fylkesveg og kommunal veg. Det legg til rette for grøn byutvikling og gode transportløysingar i Kristiansund, seier samferdselsminister Jon-Ivar Nygård.
Forslaget til Bypakke Kristiansund som i dag vart lagt fram for Stortinget, er sett saman av veg-, gang-, sykkel- og kollektivtiltak innanfor ei ramme på om lag 2,2 milliardar kroner.
– Med forslaget til Bypakke Kristiansund får folk ein påliteleg og effektiv transportkvardag, der det er lagt godt til rette for å sykle, gå og reise kollektivt, seier Nygård.
Bypakka inneheld fem tiltak på riksveg som skal leggje til rette for betre framkome, fem tiltak på fylkeskommunalt vegnett som skal leggje betre til rette for kollektivreisande og elleve tiltak på kommunalt vegnett med utbetringstiltak for mjuke trafikantar.
Framlegget er i tråd med vedtak frå lokale styresmakter. Finansieringa er basert på bompengar, statlege midlar til nokre mindre investeringstiltak og fylkeskommunale midlar, samt meirverdiavgifta som staten refunderer til Kristiansund kommune og Møre og Romsdal fylkeskommune for prosjekt og tiltak i bypakka. Det kjem to bomstasjonar på rv. 70 i Kristiansund, og det er lagt til grunn ein innkrevjingsperiode på inntil 15 år med oppstart av innkrevjinga i løpet av 2026, går det fram av forslaget.
Nokre av tiltaka
Prosjektet rundkøyring/undergang rv. 70 Trollsvingen/Røsslyngveien og kollektivfelt Goma–Atlanten vil gi auka trafikktryggleik for gåande og syklande, spesielt gjennom å leggje til rette for trygg skuleveg til nye Folkeparken skule på Goma. Tiltaket vil òg gi betre trafikkavvikling, spesielt for kollektivtransporten.
Rv. 70 Vikansvingen–Kontrollplassen er det største prosjektet i bypakka. Det er lagt opp til anleggsstart for prosjektet i 2027. Tiltaket skal bidra til å fremje miljøvenleg transport gjennom å frigjere vegkapasitet til buss og å leggje til rette for gåande og syklande. I tillegg vil prosjektet gi betre framkomst, redusert reisetid og betre trafikktryggleik.
Tiltaka ny undergang ved Rensvik og nytt Rensvikkryss ligg etter ferdigstilling fullt og heilt på eksisterande vegar. Samla bidrar desse tiltaka til eit meir trafikktrygt og samanhengande gang- og sykkelvegnett i Rensvikområdet.
Dei mange byutviklings- og kollektivtiltaka på kommunal veg, vil ha stor effekt på Kirklandet, Gomalandet, Nordlandet og nordre del av Freiøya. Tiltaka er primært retta mot mjuke trafikantar, anten som trafikktryggleiks-, sykkel- eller kollektivtiltak. Tiltaka vil samla sett leggje betre til rette for gåande, syklande og kollektivreisande, heier det i framlegget.
I bypakken ligg også fleire tiltak på fylkeskommunal veg som skal leggje betre til rette for dei som reiser kollektivt ved at fleire haldeplassar og ramper får universell utforming. Desse tiltaka har spesielt stor effekt på Kirklandet og Nordlandet, men har òg stor effekt på det samla fylkeskommunale vegnettet i Kristiansund.