Framleis stengt laksefiske i Tanavassdraget i 2025

Statusen til laksebestandane i Tanavassdraget er ikkje på det nivået forskriftene for vassdraget krev for å kunne opne for eit avgrensa fiske. Det er dermed ikkje grunnlag for å opne for laksefiske i Tanavassdraget i 2025.

– Det er all grunn til å vere bekymra for laksebestandane i Tanavassdraget. Det har aldri kome så lite laks opp i Tanaelva som i 2024. Tanalaksen treng framleis all den beskyttelsen den kan få, seier klima- og miljøminister Andreas Bjelland Eriksen.

Klima- og miljødepartementet sendte 7. mars på høyring eit forslag om ikkje å opne for laksefiske i Tanavassdraget i 2025. Forslaget var grunngjeve med det rekordlåge lakseinnsiget i 2024 og dei svake prognosane for 2025. Departementet mottok sju høyringssvar.

I forkant av høyringa blei status for laksebestandane og moglegheita for å opne for eit avgrensa fiske diskutert i møte mellom Klima- og miljødepartementet, det finske Jord- og skogbruksdepartementet og representantar frå lokale rettshavarar i Noreg og Finland. Det var semje mellom aktørane om at ein ikkje kan opne for laksefiske i Tanavassdraget i 2025.

- Vi har allereie sikra at det er dei lokale rettshavarane som har prioritet når vi kan opne for eit avgrensa fiske igjen, seier Bjelland Eriksen.