Foreslår at arbeidsmiljølova skal gjelde for fornybar energiproduksjon til havs

– Dette er ein viktig milepæl for ny industriverksemd til havs. Det er viktig at norske myndigheiter legg til rette for sikre og gode arbeidsforhold for arbeidstakarar som skal jobbe i havvindnæringa og annan fornybar industriverksemd til havs, seier energiminister Terje Aasland.

Departementet foreslår at det blir presisert i arbeidsmiljølova § 1-3 at lova skal gjelde for verksemd i samband med fornybar energiproduksjon og omforming og overføring av elektrisk energi til havs. Departementet foreslår også at overskrifta i § 1-3 blir endra frå «petroleumsvirksomhet til havs» til «virksomhet til havs». Denne endringa vil gjere det tydeleg at regelen gjeld for meir enn petroleumsverksemd.

Departementet foreslår at lovendringa trer i kraft 1.1.2026.

Når det no blir foreslått å endre arbeidsmiljølova vil det vere tilstrekkeleg lovgrunnlag for å innføre forskrift om sikkerheit og arbeidsmiljø ved fornybar energiproduksjon til havs. Havindustritilsynet arbeider for tida med denne forskrifta.