Fleire innvandrarar skal i jobb – endrar integreringslova

– Målet vårt er klart: Fleire innvandrarar skal i jobb og bli sjølvforsørgde. Difor må introduksjonsprogrammet bli endå meir relevant for arbeidslivet, seier arbeids- og inkluderingsminister Tonje Brenna.

Skal gjere det lettare å kome i jobb

Endringane skal bidra til at fleire deltakarar i introduksjonsprogrammet får tidleg erfaring frå norsk arbeidsliv. Det skal òg bli enklare å kombinere opplæring i norsk språk med arbeidstrening.  

– Fleire skal få ei reell moglegheit til å fullføre vidaregåande opplæring i programtida. Mange treng fagbrev for å få jobb, og då må vi gi dei høve til å ta det. Difor foreslår vi meir arbeidsretta innhald tidleg i introduksjonsprogrammet, og å utvide programtida for deltakarar som skal gjennomføre heile eller delar av vidaregåande opplæring, seier Brenna.

Programmet skal framleis vere tydeleg arbeidsretta, men det skal òg bli betre tilpassa dei som treng grunnleggande utdanning. Det vil bidra til at fleire får varig fotfeste i arbeidslivet – ikkje berre mellombels arbeid.

Fleire eldre innvandrarar skal få tilbod  

Regjeringa foreslår å utvide aldersgrensa i introduksjonsprogrammet, slik at også nykomne innvandrarar opp til og med 60 år får rett og plikt til å delta.

– Vi veit at mange må stå lenger i arbeid, også innvandrarar. Då må vi òg gi dei sjansen til å få den kompetansen som krevst, seier Brenna.

Forslaget er viktig for å sikre at eldre arbeidssøkarar ikkje fell utanfor kvalifiseringsløpet. Endringa skal ikkje tre i kraft før kapasiteten i kommunane er normalisert

Enklare og tydelegare reglar  

I dag finst det både ordinære og mellombelse reglar for introduksjonsprogrammet. Forslaget inneber at dei fleste av dei mellombelse reglane blir oppheva, slik at lovverket blir enklare og meir oversiktleg for kommunane.

Det blir òg foreslått å tydeleggjere at kommunen har ansvar for å samordne innhaldet i programmet – i samarbeid med andre aktørar. Det blir i tillegg foreslått å innføre tilsyn med fylkeskommunens ansvar for norskopplæring og karriererettleiing.