Endringar i lovar og forskrifter frå 1. juli 2025 frå Kultur- og likestillingsdepartementet

Endringar i lov om offentlege styresmakters ansvar for kulturverksemd (kulturlova)

Endringane forankrar ansvaret styresmaktene har på kulturfeltet i «infrastrukturkravet» i Grunnlova § 100 sjette ledd. Vidare blir det kulturpolitiske prinsippet om armlengds avstand lovfesta. Endeleg får lova ei ny forskrift om fylkeskommunal og kommunal planlegging på kulturfeltet. 

Endringane trer i kraft 1. juli 2025.

• Lov om offentlege styresmakters ansvar for kulturverksemd (kulturlova) - Lovdata
• Lov om endringar i kulturlova (føremål, armlengd og kommunal planlegging) - II - Lovdata

Ny forskrift om regionale kulturfond

Forskrifta om regionale kulturfond legg grunnlag for ei ny tilskotsordning som skal stimulere til auka aktivitet og deltaking i kulturlivet, styrke samspelet mellom profesjonelt og frivillig kulturliv, forsterke lokal og regional kulturfrivilligheit og bidra til auka kvalitet på kunst- og kulturtilbodet lokalt og regionalt. Ordninga blir forvalta av fylkeskommunane. Forskrifta er sett i kraft frå 10. juni 2025, og det vil bli gitt tilskot i år.

• Forskrift om regionale kulturfond - Lovdata
• Pressemelding 11. juni 2025: Forskrift om regionale kulturfond er fastsett

Ny lov om handsaming av personopplysningar i idretten

Føremålet med den nye lova er å legge betre til rette for at idretten skal vere ein trygg arena for alle. Lova gir idretten eit rettsleg grunnlag for å handsame personopplysningar for å forebygge, avdekke og reagere mot seksuelle overgrep, trakassering og vald mv. i idretten.

Lova trer i kraft 1. juli 2025.

• Lov om behandling av personopplysninger i Norges idrettsforbund og olympiske og paralympiske komité og dets organisasjonsledd for å forebygge, avdekke og reagere mot seksuelle overgrep, trakassering og vold mv. i idretten - Lovdata