Auka omsetning av økologiske jordbruksvarer

Omsetninga av økologiske varer i daglegvarehandelen auka med 7,8 prosent frå 2023 til 2024. Veksten i økologisk omsetningsverdi var større enn den generelle stiginga i matvareprisar.

– Eg er glad for å sjå at dei oppdaterte tala frå 2024 viser auke i både dei fleste økologiske produksjonar og omsetninga av økologiske jordbruksvarer. Dette er eit godt utgangspunkt for det vidare arbeidet med økologisk jordbruk, seier landbruks- og matminister Nils Kristen Sandtrøen.

Det blei levert 43,6 millionar liter økologisk mjølk i 2024. Det er ein auke på 4,4 prosent frå året før. 30,1 millionar liter av det blei omsett som økologisk mjølkeråvare til meieriindustrien. Dette er fyrste gong dette volumet er over 30 millionar liter.

• Les meir på nettsida til Landbruksdirektoratet: Produksjon av økologiske jordbruksvarer

Produksjonen av økologiske egg gjekk også opp etter å ha gått ned tre år på rad. Produksjonen på rundt 4 700 tonn er ein auke på 3,6 prosent. Det blei produsert om lag 3 100 tonn økologisk kjøt frå storfe, svin, fjørfe og småfe i 2024. Det svarar til ein nedgang på 0,3 prosent frå året før.

Det er venta at den økologiske kornproduksjonen skal auka med om lag sju prosent i sesongen 2024 til 2025, sett opp mot førre sesong. Auka leveransar av andre kornslag veg opp for ein nedgang i kveiteleveransar.