Abelprisen til Masaki Kashiwara
Nyheit | Dato: 26.03.2025 | Kunnskapsdepartementet
Abelprisen for 2025 går til japanske Masaki Kashiwara ved Kyoto University og Kyoto University Institute for Advanced Study. Dette er første gongen prisen går til ein forskar som bur og arbeider i Asia. Kashiwara får prisen for sitt banebrytande bidrag til algebraisk analyse og representasjonsteori, spesielt utviklinga av teorien om D-modular og oppdaginga av krystallbasar.
Abelprisen vart etablert av Stortinget i 2002 og heidrar framifrå matematisk arbeid. Prisen er på 7,5 millionar norske kronar. Prisen skal óg bidra til å heve statusen til matematikkfaget i samfunnet og stimulere barn og unge til å bli interesserte i matematikk.
– Mine hjartelegaste gratulasjonar til Masaki Kashiwara. Han er ein matematisk visjonær og verkeleg ein verdig prisvinnar. Over fleire tiår har matematikarar verda over blitt inspirerte av ideane til Kashiwara. Eg gler meg til å ønske ham velkommen til Noreg for å motta Abelprisen i mai, seier forskings- og høgare utdanningsminister Sigrun Aasland (Ap).
Kashiwara er ein uvanleg produktiv matematikar, med meir enn 70 samarbeidspartnarar. I tillegg til sine mange publiseringar har han bidratt med mange idear som andre kan utvikle. Han har skrive fleire bøker som har blitt standardreferansar i ulike matematiske felt.
Det er Det Norske Videnskaps-Akademi som deler ut Abelprisen. Dei har sett ned ein Abel-komité beståande av fem internasjonalt anerkjente matematikarar. Komiteen vurderer nominerte kandidatar og tilrår ein verdig vinnar av Abelprisen til styret i Akademiet.
Prisen vert delt ut 20. mai av Hans Majestet Kong Harald i Universitetets Aula i Oslo.
- Les meir om prisvinnaren på www.abelprisen.no.