400 millionar til kvinner og minoritetar sine rettar og likestilling
Pressemelding | Dato: 07.04.2025 | Utanriksdepartementet
Reaksjonære krefter vinn fram og truar rettane til kvinner og minoritetar i mange land. Noreg gir i 2025 400 millionar kroner til kampen for likestilling og menneskerettar for kvinner og minoritetar i utviklingsland.
– Vi ser no massive tilbakeslag verda over på kampar som har vorte vunne dei siste 30 åra – frå Uganda til USA. Derfor er innsatsen for likestilling og kvinner sine rettar viktigare enn nokosinne, seier utviklingsminister Åsmund Aukrust.
Noreg løyver no 400 millionar kroner i 2025 til internasjonalt arbeid for likestilling.
Dei nye avtalane, med varigheiter frå eitt til fem år, er inngått med dei fem norske organisasjonane Care Norge, Norsk Folkehjelp, Plan International Norge, Foreningen FRI og Noregs Idrettsforbund. Midlane skal mellom anna bidra til å få bukt med kjønnsbasert vald og fremje kvinner sin rett til å bestemme over eige liv og eiga helse, samt deira politiske og økonomiske deltaking. Nokre av midlane går òg til kampen for menneskerettane, mangfaldet og til inkluderinga av skeive.
– Når demokrati er trua, er rettane til kvinner og minoritetar dei første som fell. Det som kjenneteiknar eit demokrati, er at alle er inkluderte. Dette er eit område der Noreg kan gjere ein skilnad. Vi har lenge gått i bresjen. Sidan Gro Harlem Brundtland bidrog til å kjempe fram ein banebrytande handlingsplan for likestilling i Kairo i 1994, har dette vore ei fanesak for Noreg, seier Aukrust.
Han deltek denne veka på møte i FN sin befolkningskommisjon i New York, arenaen der nettopp kvinner sin rett til å bestemme over eigen kropp, og det som i FN-systemet heiter seksuell og reproduktiv helse og rettar (SRHR), blir diskutert.
– Eg er òg oppteken av arbeidet for å verne minoritetar mot diskriminering, fiendskap og undertrykking. Når minoritetar blir angripne, blir grunnleggjande demokratiske verdiar undergravne. Dødsstraff mot homofili i Uganda er eit døme. Hatet mot LHBT+-personar breier om seg i mange land i Afrika, Asia, Sør-Amerika og no òg land nærmare oss, som USA og Ungarn, seier Aukrust.
– Likestilling er heilt avgjerande for å nå måla våre i utviklingspolitikken. Likestilling, kvinner sine rettar og LHBT+-personar sine rettar, er område der vi er avhengige av at land som Noreg går føre viss vi skal lykkast, seier han.
– Dette angår halve jordas befolkning. Sjølv om det er mange utfordringar å ta fatt på i verda om dagen, har vi ikkje råd til å skyve dette viktige temaet til side, seier utviklingsministeren.
Fakta om kva pengane skal gå til
Care Norge:
Til arbeid for at kvinner og jenter skal ta leiarroller og vere meir aktive i samfunnet. Prosjektet skal òg hjelpe kvinner med å få betre tilgang til økonomiske ressursar og styrke mattryggleiken i lokalsamfunna deira. I tillegg skal det jobbast for at kvinner og ungdom skal kunne utøve sine rett til seksuell og reproduktiv helse, og å leve utan frykt for kjønnsbasert vald. Tiltaka er spesielt retta mot sårbare og marginaliserte jenter og kvinner, og inkluderer innsats for haldningsendringar blant gutar og menn.
Care Norge fokuserer i tillegg på å styrkje sivilsamfunnet i dei landa dei jobbar i, blant anna ved å organisere lokale spare- og lånegrupper for kvinner.
Norsk Folkehjelp
Til arbeid i 17 land med mål om å redusere ulikskap og få ei rettferdig fordeling av makt og ressursar. Prosjektet skal styrkje lokale organisasjonar og sikre at kvinner i større grad deltek i avgjerdstaking, både i organisasjonane og samfunnet generelt. Målet er òg å få bukt med seksuell og kjønnsbasert vald.
Foreningen FRI
Til arbeid for barn og ungdom med ulik seksuell orientering, kjønnsidentitet, kjønnsuttrykk og kjønnssærdrag. Målet er å redusere diskriminering og fiendskap som desse gruppene ofte møter i heimen, på skulen og i samfunnet.
Samarbeidet styrkjer òg lokale LHBT+-nettverk.
Plan International Norge
Plan International Norge jobbar gjennom organisasjonar og grupper for at jenter og unge kvinner mellom 10 og 24 år skal bli sjølvstendige, robuste og krevje rettane sine, spesielt i kontekstar der seigliva kjønnsnormer, stereotypiar og skadelege praksisar som barneekteskap og kjønnslemlesting er store utfordringar. Kamp mot fattigdom og ungdomsengasjement i kampen mot klimaendringar er òg ein del av programmet.
Norges idrettsforbund
Til arbeid for å fremje grasrotfotball i land i Midtausten og Nord-Afrika ved å styrkje dei organisatoriske strukturane. Målet er å gi fleire kvinner høve til å vere fotballtrenarar, instruktørar eller leiarar. Prosjektet vil òg gi barn som blir utestengde frå fotball på grunn av kjønn, fattigdom eller fordommar, moglegheita til å delta i trygge fotballaktivitetar. Dette gjeld spesielt flyktningar og minoritetar