Avfall

Noreg skal vere eit føregangsland i utviklinga av ein grøn, sirkulær økonomi som reduserer den samla miljø- og klimabelastninga. For å omstille til ein meir sirkulær økonomi er det avgjerande at vi reduserer avfallsmengdene våre og utnyttar ressursane i avfallet på ein betre måte.

Avfallspolitikken er i stadig utvikling. Hovudmåla er å redusere avfallsmengdene, auke førebuing til ombruk og auke materialgjenvinning. Fleire regelverk regulerer avfall i EU/EØS-landa, og Noreg er mellom anna gjennom rammedirektivet om avfall forplikta til å nå måla om 55 prosent førebuing til ombruk og materialgjenvinning av alt hushaldsavfall og liknande næringsavfall i 2025, 60 prosent i 2030 og 65 prosent i 2035.

Miljøstyresmaktene vil i åra framover foreslå fleire verkemiddel for å auke førebuing til ombruk og materialgjenvinning. 

For meir informasjon om relevant regelverk finner du hos Miljødirektoratet:

• Regelverksutvikling
• Rammedirektivet om avfall

Avfallsforebygging

Dei viktigaste grepa for å redusere avfallsmengdene er førebyggjande tiltak tidlegare i verdikjeda, som produktdesign for mellom anna lenger levetid og moglegheit for reparasjon, auka ombruk av produkt og auka materialgjenvinning. Miljøstyresmaktene arbeider med skjerpa krav til avfallsførebygging og auka utnytting av ressursane i avfallet innan prioriterte verdikjeder, der det er identifisert eit særleg behov for auka sirkularitet: emballasje, tekstilar, batteri, elektriske og elektroniske produkt, plast og køyretøy.

I 2024 vart ei ny lov om berekraftige produkt vedteke i norsk lov. Lova lèt oss stille krav til berekraftige produkt og skal bidra til at produkt kan vare lengre, kunne reparerast lettare og skape mindre avfall.

Verkemiddel

Norsk avfallspolitikk blir gjennomført i eit samspel mellom ei rekkje ulike verkemiddel: lov- og forskriftsregulering, avgifter, refusjons- og panteordningar, bransjeavtalar og informasjonstiltak, og dessutan kombinasjonar av desse. Eit viktig verkemiddel er utvida produsentansvar, som pålegg produsentar og importørar ansvar for produkta også når dei blir avfall. 

For meir informasjon om dei ulike avfallstypane, avfallshandtering og ulike verkemiddel, inkludert returordningar for avfall og produsentansvar, sjå Miljødirektoratets sider om avfall:

• Avfall
• Avfallstyper

For ei oversikt over avfallsstatistikk, kan du besøkje SSB:

• Avfallsrekneskap